Претходен број

Боцевски одржувал тајни контакти со Грција?

Социјалдемократите откриваат што може да биде мотив за оставката на Боцевски

Соња Крамарска

Опозицискиот СДСМ вчера настапи со сензационални откритија кои, ако се покажат точни, фрлаат нова светлина врз оставката на вицепремиерот Ивица Боцевски. Според потпретседателот на социјалдемократите, Гордан Георгиев, Боцевски во изминатиот период имал неколку тајни средби со личности од грчкиот државен врв, кои, како што се кажува меѓу редови, биле одржани без знаење на премиерот Никола Груевски.

„Нашата јавност и вчера остана покуса за објаснувањето на премиерот Груевски околу причините за оставката на вицепремиерот Боцевски. Затоа го прашуваме премиерот Груевски дали е точно дека во почетокот на декември 2008 во Брисел имало тајна средба меѓу вицепремиерот Боцевски и грчкиот заменик-министер за надворешни работи“, рече Георгиев.

СДСМ има информации и дека набргу по таа средба се случила и втора средба, овој пат меѓу македонскиот вицепремиер Боцевски и грчкиот државен секретар за надворешни работи. Тајните средби на Боцевски не застанале тука. „Кон средината на јуни оваа година имало средба помеѓу Боцевски и висок дипломат во грчката амбасада во Вашингтон за време на одржувањето на конгресот на Обединетата македонска дијаспора, на која е разговарано околу проблемот со името“, велат од СДСМ.

Иако потпретседателот Георгиев ги пласираше сознанијата како прашања до премиерот Груевски за тоа дали се случиле тие средби, повеќе од јасна е пораката дека тие поседуваат такви информации и сметаат оти тука лежи причината за оставката на Боцевски.

Според извори на „Утрински весник“, пак, првата искра меѓу Груевски и Боцевски се појавила кога Боцевски успеал со посредство на Брисел да се договори Грција да не ги блокира средствата за изградбата на автопатот, но потоа неговите напори биле торпедирани со ненадејната одлука на Владата да го преименува автопатот во „Александар Велики“.

Владата и натаму молчи околу оставката на Боцевски иако, за волја на вистината, и ексвицепремиерот како да потона во земја, но сосем веројатно е дека се' уште е во САД со семејството. Нашите обиди да дојдеме до релевантни информации за тоа дали ќе има владин�� реконструкција вчера завршија со неуспех, бидејќи канцеларијата на премиерот подигна ѕид од молчење.

Прашан дали ќе биде реконструиран, министерот за образование, Перо Стојановски, исто како завчера и министерот за финансии, Трајко Славевски, вчера одговори со тоа дека е презафатен. „Обврските и ангажманот во Министерството за образование и наука се толку големи што не ми оставаат време да се занимавам со шпекулации“, важно им соопшти тој на некои од новинарите.

Она, пак, што срамежливо се најавува од луѓе во ВМРО-ДПМНЕ е дека Груевски знае дека мора нешто да направи за да го намали гневот во јавноста кон министерот за правда, Михајло Маневски, но дека бара начин тоа да го изведе без поголема политичка штета за Владата. Дали моментот на извршување ситни кадровски поправки во владиниот состав Груевски ќе го искористи и за пошироко проветрување - засега никој не дава одговор.

Интересно е што ВМРО-ДПМНЕ практично ја одмолча провокацијата на социјалдемократите за средбите на Боцевски со високи грчки политичари. Портпаролот Александар Бичиклиски се огласи веднаш по изнесените наводи од СДСМ, но одби да ги коментира кратко нарекувајќи ги „глупост“. ВМРО-ДПМНЕ со веќе познатата реторика обвини дека СДСМ прави сценарија за враќање на Црвенковски на власт преку претходна дестабилизација на политичката состојба во земјата.

„Имаат соработка со една албанска партија и една македонска партија, поранешен коалициски партнер на ВМРО-ДПМНЕ, со кои се обидуваат заедно да креираат амбиент на политичка нестабилност“, рече Бичиклиски.

Премиерот Груевски вчера беше зафатен со средбата со Шарл Азнавур, која беше главен настан во владината агенда. Новинарите и натаму ја опседнуваат неговата канцеларија за односи со јавност за информации околу наредните чекори што тој ќе ги преземе за да ја стабилизира Владата, но попусто.

Евроамбасадорот Ерван Фуере апелира што поскоро да биде назначен наследник на Боцевски за да нема застој во процесот на евроинтегрирање.

Фуере вели оти тоа е важно за напредокот на земјата. Истовремено, во еден дел од изјавата Фуере откри досега непознати детали околу оставката на Боцевски. Тој рече дека минатата седмица имал средба со премиерот на која ја нагласил важноста од брза одлука за наследникот на Боцевски.

Тоа ги потврдува информациите дека оставката била поднесена многу порано отколку што беше објавена, а за неа бил информиран дури и Фуере, кој не е омилена личност во владини кругови. „Празно место во толку важна институција може негативно да влијае“, рече вчера Фуере.

Ако Груевски навистина сака оставката на Боцевски да не се рефлектира врз процесите во земјава, бездруго мора да реагира брзо со изнаоѓање ново кадровско решение. Освен ако решил да прави поширока владина реконструкција, па му треба време за консултации со коалициските партнери.