Претходен број

Иванов или Фрчкоски - ќе одлучат гласовите на елиминираните

За кандидатот на ВМРО-ДПМНЕ гласале 343.374 избирачи, а за претендентот на СДСМ - 200.316

Катица Чангова

Ѓорге Иванов и Љубомир Фрчкоски се двајцата кандидати кои ќе се натпреваруваат за претседателската функција во вториот изборен круг што ќе се одржи на 5 април. Ова го објави претседателот на Државната изборна комисија, Александар Новакоски, на вчерашната прес-конференција. Тоа значи дека одлучуваат гласовите на елиминираните кандидати од првиот круг. Претседателскиот кандидат на ВМРО-ДПМНЕ, според првичните збирни резултати од гласањето, освои 343.374 гласа или 35,06 проценти и има предност од 143.000 гласа во однос на својот противник од опозицискиот СДСМ, кој ја доби довербата од 200.316 гласачи.

Стартот во битката за атрактивната фотелја на идниот татко на нацијата по две недели, како за Иванов, така и за Фрчкоски, е од нула гласови. Засега само може да се калкулира на која сметка ќе бидат испорачани околу 440.000 гласа од петтемина кандидати кои излегоа од игра. Новите изборни правила дефинираат дека изборите за шеф на држава ќе бидат успешни доколку гласаат 40 проценти од запишаните избирачи, односно 720.000 граѓани со право на глас. Со исполнување на цензусот, престижната позиција е достапна за кандидатот со повеќе освоени гласови.

Резултатите се добиени по електронски пат од 2.823 од вкупно 2.976 избирачки места, односно 94,86 проценти. На избирачките места со преброените гласови излегле 1.011.441 гласач, што значи дека одѕивот е 56,44 отсто. Бројот на неважечки гласачки ливчиња изнесува 31.943. Недостигаат податоци од 19 избирачки места кои не беа обработени. Тоа што завчера не се гласаше на 134 избирачки места во 32 општини со 12.556 гласачи поради временските неприлики со снегот, нема влијание на резултатот во освоените гласови за претседателските избори, информираа од ДИК. Извесно е дека по две седмици на овие локации ќе се гласа првиот круг за локалните избори, бидејќи резултатите се решавачки за советнички места.

Новакоски истакна дека на локалните избори што се одржаа истовремено со претседателските, 32 општини имаат градоначалник, во 45 ќе се трча втор круг, а за осум општини податоците не биле комплетно обработени. И за Скопје ќе се гласа уште еднаш по две недели, а граѓаните од скопските општини ќе се определуваат меѓу кандидатите Коце Трајановски од ВМРО-ДПМНЕ, кој освои 98.144 гласа, и претендентот на СДСМ и НСДП, Тито Петковски, за кого гласале 57.568 избирачи.

Од изборниот ринг за шеф на држава излегуваат петмина кандидати кои се тркаа за претседател. Изненадувачки голем е бројот гласови што на своите конта како трето пласиран и четврто пласиран ги прокнижија двајца кандидати, Имер Селмани од Нова демократија и независниот Љубе Бошкоски. Практично без никаква посебна инфраструктура Селмани ја доби довербата на 146.795 или 14,99 отсто, а Бошкоски ги има симпатиите на 145.638 или 14,87 проценти од гласачите. Дури тројца претседателски кандидати, Мируше Хоџа, Нано Ружин и Агрон Буџаку, севкупно обезбедија речиси ист број гласови колку што поединечно имаат Селмани и Бошкоски. За фаворитката на ДПА, Хоџа, првата жена која премиерно во Македонија се кандидираше за претседател гласаа 30.281 граѓани или 3,09 проценти, претендентот на ЛДП, Ружин, има 39.645 гласа или 4,05 отсто, додека кандидатот на Демократската унија за интеграција, Буџаку, има 73.567 или 7,51 процент.

Колку за споредба, на вонредните претседателски избори во април 2004 година, актуелниот шеф на државата, Бранко Црвенковски, во првиот круг како кандидат на коалицијата „За Македонија заедно“ имаше 385.300 гласа и мала предност во однос на Сашко Кедев од ВМРО-ДПМНЕ, кој ја доби довербата од 309.131 гласач.

Тогаш имаше четворица кандидати за претседател, а своите сили покрај Црвенковски и Кедев ги одмеруваа и двајца кандидати од албанскиот политички блок. Гзим Острени од ДУИ и ПДП обезбеди 134.048 гласа, а за Зуди Џелили од ДПА се изјаснија 78.269 граѓани. Освоените гласови во проценти беа: Бранко Црвенковски 42,49 отсто, Сашко Кедев 34,09 отсто, Гзим Острени 14,78 отсто, а Зуди Џелили 8,63 проценти од важечките гласови. Државната изборна комисија, која ја водеше Стево Пендаровски, дојде до резултатите врз основа на 1.690.900 обработени гласови од вкупно 1.695.103 запишани избирачи во Единствениот список, односно 99,75 отсто. Поточно, пресметките во бројки се темелат од изборите на 2.954 од вкупно 2.973 гласачки места. На избори пред пет години излегоа 934.640 или 55,14 проценти од вкупниот број запишани избирачи, што е убедливо најнискиот одѕив од 1990 година.