„Мост“: Изборите според меѓународните стандарди
Граѓанската асоцијација изборите ги оцени дека биле спроведени во мирна атмосфера
Граѓанската асоцијација „Мост“ изборите ги оцени дека биле спроведени во мирна атмосфера и во најголем дел според меѓународните стандарди. Сепак, од „Мост“ укажаа на одредени неправилности за време на изборниот процес.
„Забележани се неправилности во спроведувањето на гласачката процедура, случаи на семејно и групно гласање, но не беа евидентирани никакви инциденти во и околу избирачките места“, изјави извршниот директор на „Мост“, Дарко Алексов, на вчерашната прес-конференција. Тој укажа дека набљудувачите на „Мост“ регистрирале пропусти во работењето со избирачките списоци, нарушена тајност на гласање и делење листови со инструкции како и за кого да се гласа. Регистрирано е и гласање без употреба на УВ-ламба и безбоен спреј и неадекватна идентификација на гласачите. Алексов додаде дека поради неповолните временски услови, гласањето воопшто не почнало на 92 гласачки места на кои „Мост“ имала свои набљудувачи.
Според резултатите на „Мост“, најмногу гласови добил Ѓорге Иванов, кој освоил 34,8 отсто од гласовите, Љубомир Фрчкоски има 20,1 отсто, Имер Селмани 15,2, додека Љубе Бошкоски 14,8. За Агрон Буџаку гласале 7,9 отсто, за Нано Ружин 3,9 и за Мируше Хоџа 3,4 проценти. Алексов нагласи дека добиените податоци се со 95-процентна сигурност и со маргина на грешка не повеќе од три отсто.
Во однос на изборот на градоначалник за Скопје, за Коце Трајановски се изјасниле 46,14 отсто, за Тито Петковски 27,38, за Шефкет Зеколи 10,72, а за Аргтим Нагавци 5,77. Мирјана Начевска освоила 3,62 отсто, Лазар Еленовски 2,72, Драги Колчаковски 1,24 и Страшо Ангеловски 1,09. Јанко Бачев добил 0,52 отсто, Душко Поповски 0,50, а Трпе Груевски има 0,30 проценти од гласачите.
Прелиминарните податоци на „Мост“ покажуваат дека ВМРО-ДПМНЕ освои 19 советнички места, СДСМ 11, ДУИ пет, ЛДП и Нова демократија по три, ВМРО-НП две, а Сојузот на Титови леви сили и независниот кандидат Мила Искреновиќ добиле по едно советничко место. (Ж.Х.З.) |
