Македонија ќе добие акредитација за ИПА-фондовите
Македонија до крајот на месецов ќе добие акредитација за користење средства од третата компонента (регионален развој) на ИПА-фондовите на Европската унија. Ова вчера го соопшти Министерството за финансии, додавајќи дека Македонија добила позитивно мислење и за апликацијата за акредитација за четвртата компонента, развој на човечки ресурси, при што се очекува наскоро издавање акредитација и за оваа компонента.
Во програмата на ИПА (Инструмент за претпристапна помош на ЕУ) за периодот 2007-2013 година, за Македонија се предвидени вкупно 507,2 милиони евра за сите пет компоненти.
Притоа, за користење на средствата од првата и од втората компонента (транзициска помош и прекугранична соработка) не е потребна акредитација, а за другите е неопходна. Како ќе бидат искористени предвидените средства, ќе зависи од државата, бидејќи за нивно одобрување е потребен соодветен проект. Користењето на средствата е според принципот кофинансирање, при што за проекти од првата и третата компонента, 75 отсто од финансирањето е од фондовите на ЕУ, а 25 отсто се на Македонија. За втората и за четвртата компонента, 85 отсто финансира ЕУ, додека за петтата (рурален развој) соодносот е 50:50. (Макфакс) |
