ВМРО-ДПМНЕ прави упад во МНР

Изборот на нов синдикален лидер ги судри професионалните и партиските кадри

Се случи раскол во Министерството за надворешни работи. При изборот на нов синдикален лидер во МНР, во вторникот се судрија интересите на старите професионални кадри во Министерството и новопримените партиски кадри на ВМРО-ДПМНЕ, при што тензијата што се создаваше изминативе денови околу одржувањето на седницата ескалираше во најлоша форма, со навреди, непристојни гестикулации и, на крај, прекин на состанокот.

Од извори од Министерството се дознава дека новите кадри во МНР, предводени од членовите на кабинетот на министерот Антонио Милошоски, требало да го спречат изборот на Шпреса Јусуфи за нов синдикален лидер и да го „одработат“ изборот на нивниот човек, Дејан Крстановски, на таа позиција. Со изборот на Крстановски, според извори од МНР, требало да се замолчи негодувањето на професионалните постари дипломатски кадри од партизацијата и непотизамот што се спроведува во Министерството од страна на Милошоски.

За таа цел, само во понеделникот во синдикатот се зачлениле 60 од нововработените во МНР, кои требало да ги надгласаат старите членови што биле за изборот на Јусуфи. Но, откако на седницата се покажало дека гласачката машинерија на ВМРО-ДПМНЕ во МНР не е доволна за избор на нивниот кандидат Крстановски за синдикален лидер, бил испровоциран прекин на седницата. Според изворите од МНР, наводно, предводник на луѓето на министерот Милошоски на седницата бил портпаролот, Петар Чулев. А како предводник на „тимот“ на Милошоски се посочува директорката на Директоратот за организациони работи, Маја Стојановска, според кулоарите во МНР, жената што го раководи Министерството наместо министерот.

Инаку, Шпреса Јусуфи е дипломат, која во текот на 16 години работа во МНР работела во мисијата на Македонија во Брисел и како в.д. амбасадор во Хаг, каде што замина од позицијата портпарол на Министерството додека министер веќе беше Милошоски. Крстановски во МНР е вработен од 2006 година, актуелен раководител на Секторот за јавни набавки и досега без дипломатско искуство надвор од земјата.

Откако е ВМРО-ДПМНЕ на власт, во МНР се примени околу 150 партиски кадри, односно толку колку што имаше во Министерството, па сега бројката е двојна. Најсмешно е што отфрлени кадри, ексамбасадори на Интернет-страницата на МНР се набројани веднаш по највисоките функции, па произлегува дека се многу битни во хиерархијата, иако и физички и професионално се изолирани од дневните активности. (Н.Р.)