Холандските туристи се враќаат во Охрид

ОХРИД - По две децении, холандските туристи се враќаат во Охрид. Во чест на Денот на холандската кралица и доаѓањето на првиот чартер што денеска слетува на скопскиот аеродром, во Охрид беше свечено отворен првиот дел на паркот што се гради во знак на возобновувањето на старото пријателство. Масовното доаѓање на Холанѓаните почна во шеесетите години на минатиот век и траеше до почетокот на деведесеттите и распаѓањето на СФР Југославија. Тие беа воодушевени од книгата на Ден Долард и сакаа да го видат местото каде што се случила најубавата љубовна приказна.

„Не познавам ниту еден Холанѓанец што ја посетил Македонија и што не станал амбасадор на промоцијата на вашата земја. Имате прекрасно чувство за гостопримливост и љубезност, одлична храна и услови за развој на модерен туризам“, рече амбасадорката на Холандија во Македонија, Симоне Филипини, на отворањето на паркот во Охрид. Според неа, новиот парк треба да биде копија на територијата на Холандија со многу зеленило и водни канали. (С.И.)