Уставните судии признале политички притисок, тврди ВМРО-ДПМНЕ

ВМРО-ДПМНЕ ја искористи вчерашната седница на Уставен суд да обвини за политички притисоци во оваа институција. „Уставен судија вчера првпат даде јавно признание дека Уставниот суд е под политички притисок“, рече на прес-конференција Светлана Јакимовска, пратеничка на ВМРО-ДПМНЕ и потпретседателка на Собранието, произнесувајќи се за расправата во Уставниот суд и одложувањето да донесе решение по иницијативата, како што рече, на истакнатиот член на СДСМ, Мирослав Грчев.

„Уставниот суд е под притисок да носи политички одлуки, а не правни. Таквиот вид одлуки по правило се во корист на една политичка опозициска партија. Во овој случај треба да се потенцира фактот дека притисокот врз Уставниот суд е уште пред почетокот на расправата“, изјави Јакимовска.

Таа ја цитираше изјавата на уставниот судија Зоран Сулејманов: „Овде имаме предмет кој не е правен, туку политички, што треба да го решиме, наводно, во интерес на правото, а треба да биде во интерес на нечија политичка определба“.

Јакимовска ги праша сите уставните судии дали се подготвени да излезат и јавно да кажат кој е тој што врши политички притисок врз нив и какви одлуки досега се донесени поради политички притисок.

Инаку, Уставниот суд вчера ја разгледуваше иницијативата во врска со Одлуката на Советот на Општина Центар од јануари 2010 година за измена на ДУП „Мал ринг“ и одлучи да го одложи носењето одлука за тоа дали да поведе постапка или не. Причина за тоа е потребата од доутврдување на фактичката состојба, односно да се види дали е испочитувана обврската од Законот за просторно и урбанистичко планирање да се спроведе јавна анкета која ќе трае десет работни дена. Според образложението од Уставниот суд, анкетата била спроведена во периодот меѓу 24 декември 2009 и 10 јануари 2010 година во период кога имало повеќе државни празници. (Д.Р.)