Напуштањето на Нова демократија на пратеникот Бесим Догани е разбирливо поради неговата пасивност и поради тоа што не може да одговори на интензитетот на активностите на пратеничката група. На овој начин партијата на Имер Селмани вчера го коментираше заминувањето на нивниот пратеник. Со таквата констатација се согласува и самиот Догани, кој нагласува дека неговата пасивност произлегла од тоа што не се согласувал со политиките на партијата на умилкување и приближување кон ДУИ. Тој вчера уште еднаш потврди дека неговиот ангажман ќе го продолжи како независен пратеник и дека потоа ќе се повлече од политиката. „Албанците имаат потреба од проактивни политичари, а не од пратеници што седат дома и земаат плати“, е наведено во реакцијата на НД. Иако неговиот потег го оценуваат како неумерен, сепак, велат дека партијата не може да си го дозволи „луксузот на одморање дома во услови кога власта спроведува дискриминаторска политика“. Догани се согласува дека тој извесен период се дистанцирал од активностите во партијата, поради начинот на кој НД се обидува да се доближи до ДУИ. „Не ми одговараше политиката на умилкување со ДУИ и помпезните изјави дека имаат исти мислења“. Тој повтори и дека нема намера да се врати во ДПА. (Св.У.)
