Репрезентативците на Арсиќ го тестираа срцето во „Филип Втори“
Стартуваа подготовките на најсилната репрезентација за настап на ЕП во Полска
Паралелно со подготовката на македонските јуниори за првиот меч на ЕП, во „Градски Парк“ стартуваа и подготовките на нашата најсилна селекција за настап на ЕП во Полска од 7 до 20 септември. Иако, очекувањата беа дека на првиот собир ќе се јават сите репрезентативци, сепак, Тодор Гечевски и Џеремаја Мејси ќе се приклучат неколку дена подоцна. Првиот побарал од селекторот Јовица Арсиќ уште некој ден одмор по напорната сезона, а вториот ќе пропушти некој ден поради приватни причини.
Да потсетиме на поширокиот список кошаркари се наоѓаат: Врбица Стефанов, Јане Петровски, Димитар Мираковски, Ристе Стефанов, Војдан Стојановски, Дамјан Стојановски, Диме Тасовски, Перо Блажевски, Перо Антиќ, Џеремаја Мејси, Бојан Трајковски, Кирил Николовски, Предраг Самарџиски и Тодор Гечевски. Како што е познато, Владо Илиевски го оперираше мускулот на бутот и нема да му биде на располагање на Арсиќ. Поради тоа дополнително беа повикани Костоски и Николовски.
Инаку, првиот тренинг македонските репрезентативци требаше да го имаат вчера попладне, бидејќи претпладне беа на лекарски прегледи. Имено, по барање лично на доктор Жан Митрев репрезентативците ја проверија својата здравствена слика во кардиохируршкиот центар „Филип Втори“.
Како што е предвидено кошаркарите ќе се подготвуваат 10 дена во Скопје, а на 25 јули ќе заминат на Златибор. На 1 август ќе продолжат во Крањска Гора, а првиот подготвителен натпревар ќе го одиграат на 2 август со Словенија. На 5 август во Љубљана треба да се тестираат и против европскиот првак Русија. По враќањето од Словенија следат два меча со Словачка во Охрид. Подготовките треба да кулминираат на двата турнири во Бамберг, Германија (Полска, Хрватска и Германија) и на Ефес купот во Анкара (Турција, Летонија, Велика Британија, Германија, Хрватска). (Н.К.)
|
