Надал се враќа на мастерсот во Монтреал
Светскиот рекет број два Рафаел Надал планира да почне да тренира в понеделник и да се врати во акција наредниот месец на мастерсот во Монтреал додека закрепнува од тендинитис на своите колена. Тој вчера беше подложен на нови медицински проверки во Барселона, полека заздравува од повредите и ќе биде подготвен за настап на мастерсот што почнува на 8 август.
Шпанецот го мачат тетивите на двете колена, нагризани од набиениот распоред на играње на турнирите на земја, а кои го принудија да се откаже од одбраната на својата титула на Вимблдон пред почетокот на гренд-слемот. Тоа го искористи Швајцарецот Роже Федерер, кој стигна до својата шеста круна на Вимблдон и си ја врати првата позиција на АТП-листата од Надал, кому претходно му го одзеде и трофејот на Ролан Гарос.
Надал, кој го освои Монтреал минатата година, победи на три од петте турнири на земја на кои учествуваше во април и во мај, одигрувајќи 22 меча, а за своите проблеми со повредите го обвини пренатрупаниот календар. Тој се врати во својот дом во Менорка на островот Мајорка во вторникот и изјави дека е среќен поради резултатите на своите тестови.
„Одвај чекам повторно да почнам да тренирам и да му се вратам на тоа што го сакам и што го правам најдобро, а тоа е играњето тенис“, изјави тој. „До Монтреал треба да продолжам со рехабилитацијата и да тренирам за да влезам во потребната натпреварувачка форма“. |
