Нема напредок кон ЕУ без решение за името

Иванов и Брисел како расипан телефон

Од нашиот дописник
Слободанка Јовановска

Брисел - Шведскиот премиер Фредерик Рајнфелд му реплицираше на македонскиот претседател Ѓорге Иванов од самитот на ЕУ, индиректно порачувајќи дека, со препорака или не, во октомври земјата може да направи чекор напред во преговорите само ако го реши проблемот со името. „Треба да има придвижување во билатералните преговори за спорот околу името за да се оди натаму во процесот со преговорите“, беше категоричен Рајнфелд, па илузија е по ова да очекуваме дека може да биде заобиколена Грција и со препораката да добиеме и датум.

Тврдите изјави на Иванов и на министерот Антонио Милошоски, во време кога се пишува оцената на ЕК, меѓу другото, и за добрососедските односи, звучат дегутантно за функционерите во Брисел, каде што не очекуваат долевање масло на огнот, туку приземјување околу спорот. Бидејќи перцепцијата е дека со конците раководи премиерот Никола Груевски, од ЕУ му порачуваат дека во овој поглед Владата не е конзистентна последните месеци и не влече потези со кои ќе ги потврди приоритетите за ЕУ, па и НАТО. Се' зависи од тоа какво место сака Груевски во историјата, на првото седиште или на споредното, велат извори од Брисел, за кои нема дилема дека евроинтеграцијата на земјата сега е во наши раце. Во ЕУ се плашат дека владејачката гарнитура во Македонија ќе се задоволи со добивањето на визниот режим и ќе крене раце од работењето на преговори, бидејќи вториот приоритет е врзан со сериозни политички отстапки.

Дефокусирањето на вниманието од евроинтеграцијата на евентуалните избори е втора причина за збунетост во ЕУ, од каде што потсетуваат дека не се исполнети барањата ни околу веќе одржаните, па ќе бидат дискутабилни и следните што се навестуваат кај нас. ЕК се' уште не гледа дека се санкционирани тие што ги предизвикаа инцидентите и другите нарушувања на изборниот процес, а не гледа ни системски одговор на вознемирувањата и притисоците на гласачите, како и логика во избирачкиот процес. Иако јавно не сакаат да коментираат, бидејќи не сакаат да се мешаат во внатрешните политички процеси, сепак, извори од ЕУ оценуваат дека таквиот потег би бил само губење непотребно време и одложување на проблемите место да се решаваат. Владата и политичката елита во земјата треба да покажат повеќе од посветеност за реформи и за консензус само последните месеци, порачуваат кратко дипломатски извори во ЕУ, според кои клучниот збор за тоа е континуитет.

Тоа дека на Македонија не и' требаат нови избори и дека таквиот потег нема да биде сфатен во ЕУ, оцени вчера и европарламентарецот Јелко Кацин, кој беше зачуден од фактот дека толку избори можат да се одржат во олку краток рок.

„Македонија во овој момент е стабилна држава и не гледам потреба од скорешни предвремени избори. Обратно, стабилна држава треба да покаже следните месеци дека го заслужува укинување на визите и во договор со соседна Грција бара решение кое ќе ги одблокира преговорите за влез во ЕУ. Разбирам дека Македонија како суверена држава може секогаш да го реши тоа самата. Но, владината коалиција сега е стабилна, ВМРО има убедливо мнозинство и мислам дека никој во Европа не би разбрал зошто се потребни предвремени избори“, оцени Кацин. Се' на се', оваа изјава го потврдува тоа што се гледа во Брисел, односно дека сериозно се зацврстува мислењето оти во однос на спорот околу името сме несериозни, па блокадата на датумот веројатно ќе треба да не' освести. (С.Ј.)