Иако директорот на Македонска банка за поддршка на развојот, Драган Мартиновски, вели дека нема застој во процесот на доделувањето кредити од ЕИБ, сепак, парите на рака бизнисмените ќе ги добијат по еден-два месеца. Ова произлегува од фактот дека фирмите прво треба да добијат одобрение од банките, па тие да ги испратат барањата до МБПР, а потоа таа да побара транша од ЕИБ. За да се повлече првата транша треба една или повеќе банки да соберат проекти во вредност од три, односно од пет милиони евра. ЕИБ ќе учествува со 75 отсто од средствата, а банките со 25 проценти. „Кредитната линија е целосно оперативна, потпишани се договори со девет банки и имаме најава со сигурност од една банка дека од вторник ќе почнат да пристигнуваат кредитните барања“, изјави вчера Мартиновски.

Фирмите обвинуваат дека кредитите се добиваат под истите комерцијални услови, што ги нудеа банките и досега. „Основното барање на бизнисот беше државата да застане зад стопанството. Во оваа ситуација банките повторно ќе одлучуваат кој ќе може да добие кредит“, изјави вчера Горан Рафајловски од „Консалтинг Рафајловски“. Според него, за кредитите од ЕИБ, иако на почеток изгледаат евтини поради тоа што се земаат долгорочно, ако има зголемување на еуролиборот можно е во петтата година на користењето каматата да достигне од десет до 11 проценти.

Дел од стопанствениците изразија негодување за условот со кој се бара фирмите да не отпуштаат работници во периодот на отплата на кредитот, а се интересираа и за евентуалните санкции доколку го прекршат правилото. „Само за една година стопанството се промени многу, па што ќе се случи за пет години, за да може да гарантираме дека нема да има отпуштања“, вели Горан Антески од АД „Раде Кончар“.

Банкарите, пак, ветуваат дека ќе бидат флексибилни во одобрувањето на кредитите. „На постојните клиенти ќе им биде прифатена обезбедената хипотека, додека со останатите ќе се водат поединечни разговори за нејзино определување“, објасни Глигор Бишев, директор на Стопанска банка. Провизијата што ќе ја наплатуваат банките при кредитирањето ќе изнесува максимум 1,5 проценти. (С.М.)