Компанијата презема мерки за зачувување на брендот

Скопје - Менаџментот на „Медиа Принт Македонија“ (МПМ) денеска со соопштение до јавноста ги демантира наводите на новинарите од „Утрински весник“, во кое се наведува дека она што тие го изнесоа на прес-конференција, не соодветствува со намерите на компанијата, целите на нејзината деловна политика, како и уредувањето на весникот.

„Обидот преку повикувањето на јавноста и пласирањето неосновани политички инсинуации го оценуваме како непримерен притисок врз правото на една приватна компанија да ги уредува сопствените односи внатре во куќата согласно со нејзините економски интереси и развојни цели. Мерките за рационализација, преземени на ниво на целата групација по налог на сопствениците, веќе даваат позитивни финансиски ефекти во одделни друштва и со самото тоа го оправдуваат нивното донесување и примена. Никој на ниво на групацијата не е изземен со мерките на штедење и рационализација, така што тоа не може да биде и во случајот на ’Утрински весник‘“, пишува во соопштението од МПМ.

Овие мерки, посочуваат од компанијата, се преземаат и се неопходни токму поради тоа да се одржи брендот „Утрински весник“ во рамките на целата групација, но, се разбира, не по секоја цена, туку сообразно со принципите на здравото финансиско работење и економската стабилност на компанијата.

„Менаџментот е во постојана комуникација со главниот и одговорен уредник на весникот и со претставникот на Синдикатот со цел да се обезбеди непречено и стабилно одвивање на активностите во Редакцијата. Таа конструктивна соработка е и ќе биде важен фактор и во спроведувањето на мерките на рационализација и штедење што се без алтернатива, вклучувајќи го тука и почитувањето на правата на вработените согласно со постојните законски норми“, се наведува во соопштението од менаџментот на МПМ.