На плажа во Куба или со брод до Америка

Желбите на македонските туристи за нови и далечни дестинации секоја година се се' поразлични

Сања Наумовска

Егзотични острови, Африка, Јужна Америка, Северна Европа... се дел од дестинациите што се' почесто ги посетуваат македонските туристи. Туристичките агенции се подготвени за желбите на секој граѓанин. Тврдат дека не постои точка на Земјата до која не можат да организираат летување, зимување, крстосување или само патување. А барањата се секоја г��дина се' поразлични и поспецифични за посета на нови и уште подалечни дестинации.

„Дубаи е веќе видено за нашите туристи“, велат во агенциите. Дотаму во последните неколку години се организираа голем број чартер-летови, преку кои за пристојна цена летуваа многу наши граѓани. Дубаи е далечна, но достапна дестинација бидејќи може да се посети во кое било време во годината.

Има тури и за новогодишните празници и во пролет.

Подолг период особено на цена се аранжманите за Куба, Бали, Доминикана, Малдивите... Најчесто интересот за овие дестинации се зголемува кон крајот на летото, во август и во септември. Тоа се поскапи дестинации, првенствено поради високите цени на авиобилетите. „Ако аранжманот чини од 1.200 до 1.500 евра, две третини од цената е за авиобилетот“, велат во туристичката агенција „Аурора“. На Куба има хотели каде што може да се преспие од 18 до 27 долари. Но, скапо е да се стигне до Куба бидејќи треба да се сменат три авиони, објаснуваат во агенцијата.

Ниту хотелите на Бали или Малдивите не се многу поскапи од оние во истата класа во Италија или Шпанија и чинат од 40 до 70 евра за една ноќ. Но, проблемот повторно е скапиот превоз до овие далечни места. Сепак, нагласуваат во агенцијата, има македонски граѓани што можат да си дозволат и поскап одмор, а тие се тука за да им го организираат. Иако се работи за индивидуални аранжмани, агенциите нудат комплетна услуга, организирање на патувањето, престојот, па и тури со водичи до локалните знаменитости.

Во последните неколку години хит кај македонските туристи се и крстосувањата со прекуокеанските бродови. Понудата е навистина голема и примамлива. И цените на поголемиот број од крстосувањата, особено по Медитеранот, се приспособени кон можностите на нашите граѓани.

Луксузните и далечните крстосувања, велат во туристичката агенција „Савана“, од Европа, преку Атлантикот, до бреговите на Северна и Јужна Америка или, пак, кон Африка чинат од 800 до 2.500 евра и се помалку барани. Но, затоа крстосувањата од Јадранот, до Грција и Турција или, пак, од Италија до Шпанија и Франција, па и оние кон северноевропските држави Германија, Данска и Норвешка се многу повеќе атрактивни.

„Крстосувањата по Медитеранот чинат од 300 до 600 евра, што, всушност, е во ранг на хотелски аранжман со авионски превоз до која било дестинација во Европа. Поради тоа и се многу интересни за нашите граѓани. Не се скапи, а сепак, се можност за егзотично искуство и за поинаков начин да се помине годишниот одмор“, објаснуваат во „Савана“.