Грчките таксисти го окупираа солунскиот аеродром

Таксистите, кои со денови штрајкуваат, го окупираа солунскиот аеродром „Македонија“, соопшти грчката агенција АНА-МПА. Таксистите со автомобилите го блокираа патот кон аеродромот, а потоа пеш се упатија кон терминалите и ги окупираа. Не се знае колку време ќе останат на аеродромот. Таксистите во Грција штрајкуваат веќе втора недела во знак на протест поради плановите на владата за либерализација на секторот. Нивната средба со министерот за транспорт, на која требаше да се бараат допирни точки, заврши без успех. Таксистите беа повикани од премиерот Јоргос Папандреу да го прекинат штрајкот бидејќи му создаваат проблеми на туризмот. Папандреу изјави дека е отворен за дијалог, но и ја потврди одлучноста на владата за либерализација на секторот за такси услуги. (МИА)