Претходен број

Инцидентите ја загрозуваат иднината на Македонија

Веќе девет штаба на ДУИ се демолирани, не се слушаат меѓународните апели

Светлана Унковска

Попусти се укажувањата, предупредувањата, пораките дека, доколку се продолжи со предизборните инциденти, Македонија ќе биде многу подалеку и од НАТО и од Европската унија. Инциденти се' уште има, иако тие во последнава недела се значително помали во однос на првиот налет на насилства. Продолжија гранатирањата на партиски штабови, пукањата и насилствата, а во однос на досегашните инциденти, незначителен е бројот на откриени сторители.

Свесни за згуснатата предизборна атмосфера, меѓународните фактори повикуваат на мирни избори, а во петокот директорот на британскиот Форин офис за Западен Балкан, Дејвид Лендсман, упати силна порака да нема повеќе изборни инциденти за Британија да ни помогне да добиеме членство во Европската унија. Но, истиот ден беше демолиран Изборниот штаб на ДУИ во гостиварската населба Леска.

Изминативе десетина дена предизборните пресметки помеѓу партиите од албанскиот блок и натаму ја преокупираа јавноста. Во средата, малку по полноќ, непознати лица во Гостиварско испукале повеќе куршуми во фабриката за пластична столарија откако претходно ја посети лидерот на ДУИ, Али Ахмети, со својот предизборен карван. Во исто време во селото Градец е упаднато во Изборниот штаб на ДУИ, од каде што бил украден целиот рекламен материјал. На 18 мај во Тетовско е пукано во Изборниот штаб на ДУИ, што заедно со претходните неколку дена е деветти штаб што се најде на удар на насилниците. Од гостиварскиот разгранок на ДУИ обвинуваат дека Полошкиот регион го крстосуваат и сомнителни групи кои се закануваат дека ќе бидат кренати во воздух објекти што се отстапени како партиски штабови на ДУИ.

Откако не се успеа да се обезбеди мирна предизборна атмосфера, сега целото внимание е насочено кон тоа барем денот на изборите да помине без инциденти и изборно насилство.

Амбасадорот на ОБСЕ во Македонија, Џорџо Радикати, во интервју за „Утрински весник“ вели дека е разочаран поради тоа што таквите инциденти го означуваат почетокот речиси на сите предизборни кампањи и сега Македонија како кандидат за членка во ЕУ и во НАТО мора да има повисоки стандарди и во предизборието да не прифаќа никаков вид насилство. Тој како единствен начин за поправање на угледот на земјава гледа во брзо и ефикасно истражување на инцидентите, да се казнат одговорните и да биде прекинато насилството.

На ваквите забелешки од меѓународната заедница министерката за внатрешни работи, Гордана Јанкуловска, минатата недела одговори дека полицијата ефикасно ги решава изборните инциденти за кои добила пријава.

„Судот изрече мерка притвор на двајцата осомничени за нападот врз Али Ахмети поради предизвикување општа опасност, потоа е расчистен случајот со пукањето во домот на активист на СДСМ во Велес, во кој се покажа дека нема никаква врска со ВМРО-ДПМНЕ. Поднесена е кривична пријава против референт во СВР-Тетово поради пукање во воздух во Вејце, против три лица е поднесена пријава за тепачка во Шипковица, а пријава е поднесена и за полицаецот во Струмица кој се обидел да поткупи пијан возач за гласови на СДСМ“. Ова се случаите за кои полицискиот портпарол Иво Котевски вели дека има некаков исход, но додава и дека се работи на другите случаи, не наведувајќи на кои.

Според Ермира Мехмети од ДУИ, ваквиот неповолен предизборен амбиент е стратегија на ДПА и нивниот заменик-министер за внатрешни работи во оставка, за максимално да се престрашат граѓаните и да не излезат на гласање, а потоа, вели таа, неискористените избирачки ливчиња да бидат злоупотребени за фалсификат.

„Силно се надеваме дека барем денот на изборите ќе помине мирно, иако имаме сериозни дилеми околу тоа колку можат да бидат мирни. Сакам да упатам порака дека сценариото им е прочитано и нема да дозволиме да успеат нивните обиди за заплашување. Не постои дилема дека доколку се случат какви било инциденти, одговорноста ќе падне на ДПА“, реагира Мехмети. Таа додава дека од почетокот на кампањата нивните активисти се изложени на постојани провокации за да се прават инциденти што му штетат на угледот на државава.

Портпаролот на ДПА одби да ги коментира ваквите обвинувања, поради презафатеност.

Вчера ВМРО-ДПМНЕ го нападна својот политички опонент СДСМ дека како оправдување за изборниот пораз има сценарио за предизвикување инциденти што требало да се интензивираат неделава, а да кулминираат на денот на изборите. Од СДСМ одговараат дека во владејачката ВМРО-ДПМНЕ владее паника што ги разоткрива нивните намери за фалсификување на изборите, за што ќе ги известат ОБСЕ и другите претставници на меѓународната заедница.