Претходен број

Светско признание за македонскиот иноватор Јоти Поповски

Пречистителната станица на македонскиот иноватор инсталирана и на Антарктик

Од нашиот дописник
Слободанка Јовановска

БРИСЕЛ - Службена зграда што троши нула енергија, станбени комплекси исклучиво на еколошка енергија, технологии за заштеда и заштита на околината - се проектите на иднината што се најдоа на листата на наградени на австриската фондација „Енерџи глоуб“, а официјално беа објавени на целодневна свечена церемонија во Европскиот парламент во Брисел. Меѓу нив беше и проектот на Јоти Поповски од Македонија - пречистителна станица за отпадни води која, како што изјави самиот, работи без енергија, нема потреба од резервни делови, а водата што излегува е чиста речиси колку и домашната за пиење.

Поповски беше еден од стотината наградени од целиот свет кои во конкуренција од над 800 проекти го добија ова светско признание, во присуство на поранешниот советски лидер Михаил Горбачов, поранешната министерка за екологија на Индија, Манека Ганди, и филмската ѕвезда од Боливуд, Амир Кан.

Спектаклот на кој присуствуваа и првиот човек на ЕК, Жозе Мануел Баросо, претседателот на ЕП, Ханс Герт Потеринг, и поранешниот генерален секретар на ОН, Кофи Анан, покажа на кое ниво се издига потребата од користење чиста и обновлива енергија, од нејзина заштита и од заштита на човековата планета.

Поповски, горд на иновацијата што се применува веќе десетта година, изјави дека ваквата пречистителна станица е значајна за Македонија, бидејќи има дефицит од електрична енергија што би требало да ја троши за заштита на околината. Според него, станицата се продава на три континента и е прва што е инсталирана и се применува на Антарктикот, каде што опстојува на минус 40 степени. Последната пречистителна станица на Поповски е продадена на Дубаи и е инсталирана на островот на шеикот. Со неа можат да се пречистуваат индустриските води од пиварниците, металските комбинати, од месната индустрија и слично, а функционира со инсталирање бактерии кои ја уништуваат нечистотијата. Според производителите на оваа станица, компанијата „Интермонт“, нејзина предност, освен некористењето енергија, е и тоа што работи на природен начин, но само 18 такви се продадени во Македонија, бидејќи повеќе им веруваме на странските технологии.

Дека екологијата не треба веќе да се запоставува најдобро илустрираше Манека Ганди, која предупреди дека со растот што го има сега Индија до 2013 година ќе ги дуплира емисиите на штетни гасови и ќе ја качи светската глобална температура за шест проценти. Таа ги посочи САД како најголеми произведувачи на штетни гасови и апелираше до сите да ја сфатат важноста на ваквите проекти.