Надоместоците за невработените ќе зависат од трошоците

Надоместоците што ги земаат лицата од Агенцијата за вработување да се усогласуваат согласно со трошоците за живот, а не како досега согласно со порастот на просечната плата во државата, предвидуваат измените на Законот за вработување и осигурување во случај на невработеност, за кои вчера се расправаше на собраниската Комисија за труд и социјална политика. Станува збор за надоместоците за лица што ги примале подолго од 12 месеци, а се на возраст од околу 60 години. Заменик-министерот за труд и социјална политика, Спиро Ристовски, истакна дека измените се во насока на воспоставување единствен концепт за пресметување на висините на надоместоците, со оглед на тоа што, како што појасни тој, е веќе воведен во неколку други закони.

За разлика од ваквиот став на заменик-министерот, опозицијата смета дека на ваков начин Владата само признава дека нема пари во буџетот и оти сака да ги намали трошоците, бидејќи, како што посочија, имало тренд на пораст на платите, па на таков начин би се зголемувале и надоместоците. „За разлика од тоа, статистика подолг период нема излезено со податоци за пораст на трошоците за живеење, иако ние секојдневно гледаме дека има пораст на цените на производите. Со измените нема да се покажуваат надоместоците, туку ќе можат и да се намалуваат“, рече Роза Топузова-Кареска од ЛДП.

На ова реплицираше Ристовски, кој истакна дека одредбата е прецизна и вели дека надоместоците ќе се усогласуваат согласно со порастот на трошоците за живот. (МИА)