Нонковиќ ќе добие наследник викендов

Андриќ, Гочанин и Дамјаниќ во игра за нов селектор на македонските ватерполисти

Роберт Димитриевски

Проектот „Македонска ватерполо репрезентација“ нема да заврши со дебаклот на неодамнешното Европско првенство во Загреб, на кое таа заврши на последното место. Напротив, од Пливачката федерација ��а Македонија со несмалени амбиции му приоѓаат на новиот квалификациски циклус, овој пат за Европското првенство 2012 во Холандија, кој ќе почне веќе наредниот месец. За тоа зборува и интензивната потрага по нов селектор по оставката на Стеван Нонковиќ, кому му пукна филмот по бламажата на неговите избраници против аутсајдерот Турција, по што во мечот за 11. место со Русија воопшто не им зборувал.

Новиот кормилар на националниот ватерполо тим треба да се знае за неколку дена, откако претстојниот викенд челниците на ПФМ ќе ги финализираат разговорите со неколкуте кандидати. Во игра се четири-пет имиња, од кои најзвучни се Србите Драган Андриќ и Игор Гочанин и Хрватот Милорад Дамјаниќ. Андриќ и Гочанин се легенди на ексјугословенското ватерполо - првиот беше капитен на селекцијата што го освои олимпиското злато во Лос Анџелес 1984 и во Сеул 1988, каде што во составот беше и Гочанин. Минатата година Андриќ го водеше грчки Панатинаикос, а Гочанин и пред ЕП, наводно, бил блиску до македонската клупа, но сакал да ја води само репрезентацијата, не и Работнички, за што ќе мораше да се пресели во Скопје. Дамја��иќ, пак, на ЕП во Загреб ја водеше хрватската женска репрезентација, а бил и селектор на јуниорите, тренер на Младост и еден од помошниците на Ратко Рудиќ.

Откако стана јасно дека Нонковиќ сигурно ќе си оди по тригодишниот ангажман, во кој прво му беше помошник на Љубиша Мечкиќ на ЕП 2008 во Малага, за потоа како селектор да стигне до 14. место на СП 2009 во Рим и до 12. место на ЕП во Загреб, прва опција беше Сашко Поповски. Но, капитенот на репрезентацијата во Малага засега прифаќа да биде само член на Стручниот штаб.

„Како поранешен ватерполист и репрезентативец секако дека ме влече селекторската функција, но како семеен човек и бизнисмен во моментов не можам целосно да се посветам на една толку одговорна задача. Згора на тоа, ќе мораше да го водам и Работнички, кој сезонава ќе игра во Првата А-лига на Србија. На новиот селектор му стојам на располагање со моите совети“, вели Поповски.

Паралелно со трагањето по наследникот на Нонковиќ, се размислува и за подмладување на репрезентацијата и за кооптирање поголем број домашни играчи. Еди Бркиќ најави завршување на кариерата, но од ПФМ го убедуваат да помогне барем уште во првиот квалификациски круг, во кој Македонија за противници ќе ги има светскиот вицешампион Шпанија и Белорусија. Капитенот Ненад Петровиќ, како и Владимир Латковиќ, Ненад Босанчиќ и Даниел Бениќ се без клупски ангажман, па ако не го засилат Работнички може и да отпаднат од комбинација за државниот тим на Македонија.

Првпат во историјата на квалификациите за ЕП во ватерполо ќе има две фази. Во првата ќе се игра по принципот секој со секого дома и на гости, по што по два најдобри тима од секоја од шесте групи ќе продолжат во вториот круг. Таму, пак, победниците на секоја од групите ќе играат бараж со некоја од шесте второпласирани селекции, а двојките ќе бидат одредени со ждрепка. Шесте победници во баражот ќе им се придружат на еврошампионатот на Хрватска, на Италија, на Србија, на Унгарија, на Црна Гора и на домаќинот Холандија, кои автоматски се пласираа врз основа на пласманот на ЕП во Загреб. Следното Европско првенство ќе се одржи во јануари 2012 година во Ајндховен.