Секогаш задоволниот Бенитез

Интер на гостувањето кај Твенте во групата од ЛШ одигра слабо, но Шпанецот виде напредок

Рафаел Бенитез уште не седнат на клупата на Интер, почна да ја врти истата плоча од „Енфилд роуд“. И кога на очиглед на европската фудбалска јавност неговиот тим ќе одигра потпросечно, тој на цел глас ќе викне: „Задоволен сум, формата оди по нагорна линија“.

Имено, европскиот шампион на гостувањето кај Твенте ни оддалеку не потсети на играта од минатата сезона. Поведе со 1:0 со голот на Снајдер, но набргу Холанѓаните го завртеа резултатот со погодокот на Јенсен од слободен удар и автоголот на Милито. По асистенцијата на македонскиот репрезентативец Горан Пандев, Самуел Ето израмни на 2:2. Сето тоа се случуваше во првиот дел во кој Интер беше во подредена улога.

Во вториот дел гледавме лош и резервиран фудбал на двете страни. Непрецизни додавања, инертност, спорост. Некои велат дека тоа е резултат на напорната сезона на играчите на Инте, која кулминираше со Светското првенство во Јужна Африка.

„Резултатот не е сјаен, ама е добар. Тешко е да се прифати бод по водство, но не смееме да заборавиме на пресвртот од првото полувреме. Се обидуваме да играме висок пресинг, ама со тоа понекогаш имаме тешкотии, па ризикувавме со контранапади. Во вториот дел одеше подобро, ритамот константно се подигнува. Уште е рано да се зборува, но веќе се гледа одреден напредок“, кажа Бенитез, кој упати пофални зборови на адреса на противникот.

„Во првиот дел бевме во опасност. Добро не оддалечија од својот гол, не беше лесно да се контролираат, а на домашен терен имаа мотив повеќе“.

Иако постигна еден гол, ама во сопствената мрежа, Бенитез истакна дека е задоволен и од Милито. „Имаше солиден придонес за тимот. Особено сум задоволен до неговото залагање. Инаку, како тим мора да поработиме на себе“.



За тежината на повредата на Пандев Ќе се знае денеска



Македонскиот репрезентативец Горан Пандев во 61 минута од дуелот со Твенте заработи повреда на коленото, која во прв момент ги застраши сите. И тренерот Бенитез и навивачите на Интер, како и многубројните фанови во земјава. Пандев беше изнесен на носила и тоа дополнително ја издраматизира ситуацијата. Вчера вестите беа поблаги. „Пандев го изврте коленото и на прв поглед тоа изгледаше многу сериозно. Но лекарите ми внесоа оптимизам. Коленото треба да се снима и ќе знаеме прецизно за што се работи“, изјави Бенитез. (Н.К.)