Вардар покус за три бода

Клубот е казнет и со 2.500 евра поради неоправдано неодигран меч со Хоризонт во Турново

Дисциплинската комисија на Фудбалската федерац��ја на Македонија, како што и се очекуваше, го почитуваше Правилникот за натпревари и го казни Вардар со одземање на три бода затоа што неоправдано не отпатувал на првенствената средба со Хоризонт во Турново во четвртото коло. Како што е познато, овој меч црвено-црните го загубија и со службен резултат - 3:0. Комисијата не ги прифати лекарските наоди издадени од една приватна ординација во Ѓорче Петров во кој се наведува дека 11 фудбалери на Вардар пријавиле дека чувствуваат болки во стомакот и повраќање поради наводно труење со храна и поради тоа тренерот Ѓорѓи Тодоровски немал доволен број фудбалери за да го одигра мечот во Турново. Меѓутоа, целиот случај со труење не бил пријавен како што тоа налагаат прописите кога е во прашање масовно труење и воопшто не бил пријавен до Инфективната клиника и до Санитарната инспекција. Сето тоа било заборавено не само од клубот туку, за жал, и од приватната ординација.

За членовите на Дисциплинската комисија целиот случај е сомнителен, нема цврсти докази за масовно труење освен тие лекарски наоди од приватната ординација и Вардар беше казнет со одземање на три бода од и онака минималното бодовно салдо. Освен тоа, клубот е казнет и со 2.500 евра. По оваа одлука Вардар има право на жалба до Комисијата за молби и жалби на ФФМ. (М.М.)