Претходен број

И СДСМ со своја градоначалничка тројка

Директен учесник во новата изборна трка повторно ќе биде и привремениот претседател на СДСМ, струмичанецот Зоран Заев

Главен предизвик за опозицијата е да ја освои скопската општина Центар и да ја поврати контролата во Карпош

Александра М. Митевска

За тројца од досегашните градоначалници на СДСМ речиси е извесно дека ќе се обидат да добијат втор мандат на мартовските локални избори. Покрај Александар Петревски од Охрид и Зоран Дамјановски од Куманово, директен учесник во новата изборна трка повторно ќе биде и привремениот претседател на СДСМ, струмичанецот Зоран Заев.

Кога ВМРО-ДПМНЕ објави дека ќе ги поддржи кандидатурите на досегашните градоначалници на Битола, Прилеп и на Пехчево – Владимир Талевски, Марјан Ристески и Јованчо Станоевски, во сдсмовската база течеше постапката за евидентирање и за самокандидирање на можните кандидати за градоначалници и за советници. Процедурата заврши минатиот викенд, а по разгледувањето на дел од материјалите од општинските организации, се наѕираат можните градоначалнички кандидати за некои од скопските општини. Сепак, од информациите што доаѓаат од штабовите на власта и на опозицијата, тешко може да се утврдат ривалските двојки, бидејќи и едните и другите прво ги соопштуваат имињата на своите кандидати во општините во кои се надеваат на најсолиден резултат.

Главен предизвик за опозицијата е да ја освои скопската општина Центар и да ја поврати контролата во Карпош, каде што десницата го презеде мнозинството кога Андреј Петров ја напушти градоначалничката функција и се пресели во парламентот. Социјалдемократите од Центар ги предложиле како можни кандидати Дамјан Манчевски од Извршниот одбор на партијата, Јани Тагасоски, претседател на партиската општинска организација и актерот Петар Арсовски. За Карпош, пак, ќе се избира меѓу Јован Деспотовски од ИО на СДСМ, поранешниот директор на УБК, Миле Зечевиќ, и лекарот Тихомир Матовски. Во некои месни организации како можен претендент за градоначалничката функција бил предлаган и либералдемократот Стевчо Јакимовски, ама преовладало мислењето дека социјалдемократите треба да настапат со свој кандидат.

СДСМ има тројца потенцијални кандидати и во Аеродром, каде што ќе се одлучува меѓу поранешниот студентски лидер Диме Велков, амбасадорот Тихомир Илиевски и архитектот Никола Велковски. За Кисела Вода, пак, како најсериозен предлог се споменува Чедомир Саздовски, кој беше градоначалнички кандидат и на претходните избори.

Адутот за главниот град ќе се чува во тајност до февруари, кога СДСМ веројатно ќе ја составува и советничката листа за Скопје, за каде што, наводно, имало најголема навалица од звучни имиња кои останаа без функции по губењето на власта. Не е исклучено дотогаш да тактизира и владејачката десница, имајќи предвид дека победата во Скопје, всушност, го одредува изборниот победник.

Од градоначалниците на ВМРО-ДПМНЕ во скопските општини како посигурни за уште еден мандат се споменуваат Петар Латиновски од Бутел и Коце Трајановски од Гази Баба, кој се споменува и како еден од фаворитите во битката за главниот град.

ВМРО-ДПМНЕ неодамна соопшти и дека во Кичево ќе ја поддржи кандидатурата на претседателот на тамошниот општински комитет, Благоја Деспотовски. Во Кочани, пак, владејачката партија ќе му даде нова шанса на пратеникот и стопанственик Ратко Димитровски, кој во 2005 година ја изгуби градоначалничката битка. Но, овој пат Димитровски ќе има друг ривал од СДСМ, бидејќи Љубомир Јанев, кој неодамна стана потпретседател на опозициската партија, наводно, се откажал од можноста за трета градоначалничка кандидатура.

Во битка за уште еден мандат најверојатно нема да влезе ниту штипскиот градоначалник Панде Сарев, бидејќи социјалдемократите овој пат сметале на претседателот на општинската организација, Ванчо Коцев. Од друга страна, големи се шансите либералдемократот Аце Коцевски, со поддршка на СДСМ, трет пат да се обиде да ја добие довербата на велешани. Социјалдемократите во Велес заклучиле дека во изминатиот период одлично соработувале со Коцевски и дека не им пречи да го поддржат и на претстојните избори, и покрај одлуките на централите на СДСМ и на ЛДП за самостоен настап на претстојните избори. За возврат, пак, не се исклучува можноста либералдемократите уште во првиот круг да ги поддржат кандидатите на СДСМ во некои „покритични“ општини, иако поголема соработка меѓу некогашните коалициски партии се очекува во вториот изборен круг.