Претходен број

Владата ќе набави лаптоп-компјутери и за основците

Жаклина Хаџи-Зафирова

Секој ученик од прво до трето одделение, како и нивните наставници ќе добијат лаптоп-компјутери, најави вчера министерот за информатичко општество, Иво Ивановски, обраќајќи се на вчерашната четврта Меѓународна конференција на тема „Информатичко-комуникациски технологии во образованието“ што ја организираше Фондацијата „Метаморфозис“. Како поголеми проекти за подобрување на македонскиот ИТ- пазар, министерот ги спомна проектите компјутер за секое дете, студентските ваучери за компјутери, намалувањето на ДДВ и компјутерските обуки на над 30 илјади граѓани.

Владините претставници вчера ги демантираа информациите за пропустите во проектот „Компјутер за секое дете“, реплицирајќи дека никој не им е виновен на наставниците што не ги користат компјутерите. Тие најавија дека до крајот на јануари се очекува комплетирање на компјутеризацијата и во основните училишта.

Според Ивановски, македонскиот ИТ- пазар е зголемен за околу 63 проценти.

„Најзначаен проект е компјутер за секој ученик. Средните училишта се опремени, во наредниот период ќе се доопремат и основните училишта. За секој ученик од прво до трето одделение, како и за наставниците ќе бидат набавени лаптоп-компјутери. Набавката на опремата е во тек, како и набавката на видеопроектори, печатачи и мултифункциски уреди за училиштата“, рече Ивановски.

Тој најави дека започнале и со проектот за електронско поврзување при полагање на стандардизираните тестови. „Станува збор за 100 илјади ученици кои во ист момент ќе имаат пристап до овој систем кој се' уште не постои на Балканот. Очекуваме системот да придонесе за подобрување на резултатите со кои ќе бидат оценувани учениците, професорите и самите училишта“, вели Ивановски, но не открива колку ќе чини системот. Идната година,додаде Ивановски, ќе се воспостави систем за управување со документи во сите министерства, а ќе се изгради и единствена база на податоци на државните институции. План на Владата е да формира и Национален совет за информатичко општество.

Министерот за информатичко општество вели дека се немоќни да се справат со крадењето „мауси“ во училиштата. Според него, неупотребата на компјутерите во училиштата е вина на наставниците.

„Во средните училишта ги ко��истат компјутерите. Но, има извесен број директори кои од нејасни причини не ги користат компјутерите под изговор дека обуките не се завршени. Тоа не е точно, бидејќи 200 информатичари ја завршија обуката и тие имаат капацитет да помогнат и на своите колеги“, смета Ивановски. Тој додаде дека наставниците поминале и обука на УСАИД пред неколку години.