Претходен број

Бошкоски: Мина времето на едноумието

ДЕЛЧЕВО - „Не ја прифаќам паролата еден за сите. Минато е времето кога еден мислеше за сите, минато е времето на едноумието“, порача независниот претседателски кандидат Лубе Бошкоски завчера од митинг во Делчево.

„Од градот што го носи името на апостолот македонски Гоце Делчев, од градот на возобновителот на ВМРО, Љупчо Георгиевски, порачувам: доста поделби, доста расправии, време е да се обединиме за доброто на нашата намачена татковина Македонија“, додаде Бошкоски.

Тој рече дека се држи на пораките од евангелистот Лука: „Моли се за твоите душмани за да не влезе во тебе омразата“.

„Нема во Македонија место за омраза ни спрема тие од друга вероисповед, ни спрема тие од друга политичка опција, време е меѓусебно да си подадеме рака, да си простиме да се здружиме кон заедничката цел - економски просперитетна, демократска, европска Македонија“, потенцира Бошкоски.

Во врска со спорот на Грција, тој рече дека нема пазар за името и за македонските национални и државни интереси.

„Компромис е можен, ама не со губење на идентитетот и државното достоинство. Знам како може Македонија да влезе во НАТО. За Македонија има надеж, бидејќи Македонците се чесен и трудољубив народ. Тие заслужуваат претседател што ќе знае да се справи со проблемите и на земјоделците, и на стечајците, и на бранителите, и на пензионерите. Затоа, на 22 март, излезете и слободно гласајте за сигурна иднина“, им порача Љубе Бошкоски на делчевци. (Д.Р.)