Советот за радиодифузија задоволен од известувањето на медиумите
Прекршочни пријави за Сител и Наша ТВ за небалансирано известување
Медиумите во изминатите десет дена како никогаш досега се придржуваат на правилата при известување за изборната кампања. Ова е оцената на Советот за радиодифузија што ја презентираше вчера претседателот на ова тело, Зоран Стефановски. Советот, генерално, е задоволен од медиумите, кои, како што рече, биле на висина на својата должност, со одредени исклучоци.
Во таа насока беше посочена телевизија Сител против која Советот донел одлука да поведе прекршочна постапка поради неизбалансирано покривање на претседателските кандидати и на кандидатите за локалните избори, како и за субјективниот пристап во известувањето за редовните активности на Владата. Покрај разликите во времетраењето, забележана е разлика и во „тонот“ на презентираните информации во корист на власта. Против телевизија Наша ТВ, пак, Советот ќе поведе прекршочна постапка поради непочитување на правилата за емитување платено политичко рекламирање.
Од Советот укажуваат и на релативна неизбалансираност во покривањето на изборната кампања и на телевизиите Телма, Алфа, првиот сервис на Македонското радио, радиопрограмата на албански јазик на каналот на етничките заедници, МТВ 1 и МТВ 2 - Програма на албански јазик.
Како пример за релативна избалансираност се посочени телевизиите Алсат М и Канал 5.
Советот донел одлука да упати и укажување до телевизија А1 поради учество на малолетници во платено политичко рекламирање на кандидатот за градоначалник Фијат Цаноски. Наедно, Советот донел одлука да упати укажување до оваа телевизија поради емитување на спотот за кандидатот за претседател од СДСМ, Љубомир Фрчкоски, нарачан од ВМРО-ДПМНЕ, што содржи непри��тоен (вулгарен) говор. Според ова тело, спотови со ваква содржина може да се емитуваат на програмите на радиодифузерите во периодот од 21 до 5 часот, согласно со Правилникот за заштита на малолетната публика од програми што можат штетно да влијаат врз нејзиниот развој.
Како што додаде претседателот на Советот, Стефановски, ја поддржуваат и кампањата на ДИК за информирање на граѓаните за начинот на гласање и за остварување на избирачкото право и ги повика радиодифузерите почесто да ги емитуваат спотовите. Членовите на ова тело потсетуваат и на обврската за посебно означување на бесплатните кампањи. (Г.Д.) |
