РЗЗЗ во 2007 година трошел незаконски и ненаменски
Републичкиот завод за здравствена заштита во 2007 година трошел незаконски и ненаменски, утврдил Државниот завод за ревизија. Со оваа институција во тој период раководел бившиот директор д-р Драган Ѓорѓев.
Според наодите на државниот ревизор, без одлука биле делени надоместоци на членовите на комисиите за јавни набавки, за што биле потрошени околу 10.000 евра заедно со колективното осигурување на вработените. Околу 50.000 евра, пак, незаконски биле исплатени како хонорари за работи и работни задачи кои произлегуваат од работниот однос.
Во делот на јавните набавки е утврдено дека без тендери биле набавувани материјали и други стоки. Така, на пример, спроведена е постапка со отворен повик за набавка на лабораториски готови подлоги во вредност од над 400.000 евра без да се објави меѓународен тендер што е спротивно на Законот за јавни набавки. Државните ревизори утврдиле и други неправилности. (Ј.Ј.) |
