И со торба пари тешко се стига до чанта „Луј Витон“

Некој е среќен ако во кризата го зачувал работното место, па не мора да се откажува од многу работи. Но, и оние што немаат проблем со пари понекогаш мора да си ги дисциплинираат желбите.

На „Шанзелизе“ во Париз долга редица пред една продавница, дури на вратата стои и редар. Не станува збор за распродажба, туку сосема спротивно - се чека во редица за луксузна стока. Конкретно, женски кожени чанти од марката „Луј Витон“. Цените не се за секого, па, сепак, некои упорно чекаат да дојдат на ред. „Минав долг пат од Јужна Африка. Денеска ми е последен ден и уживам во шопингот“, вели една муштерика. „Имаме кредитна картичка за неограничена сума“, вели друга.

Но, во оваа продавница ни тоа не помага: продажбата е ограничена само на една чанта за купувач. На касата дури го бележат и бројот на пасошот на купувачите, за некој да не смислува досетки за да дојде до две чанти. Европската индустрија на луксузни стоки доживува бум во втората година по големата криза. Експертите проценуваат дека „Луј Витон“ годинава ќе оствари приход повисок за 20 отсто, иако, всушност, биле планирани половина од тоа. И кај „Шанел“ се очекува пораст од 20 отсто. Се разбира, ако за луксуз се чека во редица. „Повеќе од 80 проценти од луѓето се од Азија - Кина бележи значителен пораст и многумина муштерии од Кина пазарат овде. Вработените во продавницава ми кажаа дека многумина Кинези купуваат многу производи на ’Луј Витон‘ и поради тоа нам ни дозволуваат да купуваме само една чанта“, вели една муштерика.

Од претпријатието се воздржуваат од коментар во врска со ова. Со проблеми од ваква природа, разбирливо, добро се живее. Финансиска криза, презадолжени државни буџети, засеци во социјалната сфера - на „Шанзелизе“ во Париз нема трага од сето тоа, само луксуз на сите страни. (Дојче веле)