„Д и Б“ ни прогнозира раст на БДП од 0,5 отсто

Една од најпознатите светски бонитетни куќи „Дан енд Бредстрит“ ја ревидираше надолу процената за раст на македонската економија во 2010 година од 1,0 отсто на 0,5. „Економските перформанси се послаби од оч��куваните, затоа ние очекуваме благ пораст од 0,5 отсто во 2010 година, наспроти нашите претходни предвидувања за раст од 1,0 отсто“, информираат од оваа куќа.

Ваквата измена на процената се образложува со бавното темо со кое закрепнува македонската економија. „Реалниот БДП се зголеми за 0,4 отсто во вториот квартал во споредба со истиот период лани. Приватната потрошувачка се зголеми со слаби 0,1 отсто, иако потрошувачите и натаму се задржани. Тоа се одразуваше на благо подобрување на домашната побарувачка, а со тоа и мало зголемување на увозот, но со оглед на се' уште нискиот извоз, трговскиот дефицит останува на високо ниво“, се наведува во соопштението на „Дан енд Бредстрит“.

Кредитниот рејтинг на Македонија и во последната објава на „Дан енд Бредстрит“ за ноември се задржа на БД4б, што ја става во група на земји со умерен ризик.

Оваа бонитетна куќа очекува македонската економија да има голема корист од приклучувањето на државата во регионалната железничка транспортна мрежа Карго 10, формирана од страна на железниците на Словенија, Хрватска и на Србија, што ќе го поврзува австрискиот град Салцбург со грчкото пристаниште во Солун. (Ек.Р.)