Хрватска се одлепи од Балканот

Полноправна членка на ЕУ од 1 јули 2013 година

Министрите за надворешни работи препорачаа шефовите на држави и влади на самитот на ЕУ да ги прогласат за завршени преговорите со Хрватска

Приклучувањето на Хрватска кон ЕУ во 2013 година е речиси готово. Германскиот државен секретар Вернер Хојер во Брисел изјави:

„Мислам дека се надминати најзначајните пречки. Поглавјата што причинуваа големи проблеми, како што се конкурентноста или соработката во сферата на правосудството, се на добар пат“.

В петок шефовите на држави и влади на ЕУ треба да дадат согласност за планот за приклучување на Хрватска. Во втората половина на годинава договорот со Хрватска би требало да биде потпишан. Досега дилеми имаше пред се' Франција. Се стравува дека би можеле да попуштат напорите на Хрватска во борбата против организираниот криминал. Поради тоа, министрите за надворешни работи на ЕУ заклучија дека Европската комисија би требало да доставува извештаи за напредокот на Хрватска до моментот на приклучување. Доколку се јават сомневања, приклучувањето кон ЕУ би можело да биде одложено.

Но, контролите веќе нема да се прават откако Хрватска ќе стане членка. Хојер вели дека за Хрватска не би смеело да има вонредни правила. И кај другите земји на ЕУ, ЕК не врши постојани проверки околу тоа дали ги исполнуваат критериумите за приклучување. Сепак, Хојер тука гледа проблем:

„Како да се однесуваме ако некоја земја пред приклучувањето перфектно ги исполнува условите, ги исполнува и во текот на ратификација на процесот и ден потоа, но одеднаш се јавуваат сомнежи во врска со елементарни прашања?“

Како што, на пример, се случува со Унгарија. Владата во Будимпешта донесе контроверзен закон за медиуми. Некои експерти аргументираат дека тој не соодветствува со европските темелни вредности и дека овозможува цензура од страна на државата. Затоа Хојер сака да биде проверено кои можности и' стојат на располагање на ЕУ за спроведување на критериумите за приклучување и по приклучување кон ЕУ.

Иво Санадер сака да биде екстрадиран

Загреб - Поранешниот хрватски премиер Иво Санадер, кој од 10 декември е во притвор во Салцбург, усно се изјаснил пред надлежниот суд дека се согласува да биде екстрадиран во Хрватска, соопшти адвокатскиот тим на Санадер.

Адвокатот Горан Суиќ наведе дека сега се чека потпис на австриската министерка за правда и техничка подготовка и организација за екстрадиција на Санадер.

„По потписот на министерката, треба од 7 до 15 дена“, наведе Суиќ. Санадер е обвинет за злоупотреба на службената должност и за перење пари.