Нафтата близу 82 долари поради студот

ЊуЈорк - Цената на нафтата ја надмина границата од 81 долар, достигнувајќи 81,51 долар за барел, што е највисоко ниво во последните 15 месеци, благодарение на студеното време во САД и во другите големи потрошувачи на енергенси. Нафтата на берзата во Њујорк поскапе 2,15 долари, на 81,51 долар за барел, што е најголема заклучна цена од 9 октомври 2008 година. Европската нафта „брент“ истовремено поскапе за 2,19 долари, на 80,12 долари за барел. „Ниските температури во САД, како дел од глобалниот студен фронт и слабиот долар, ја зголемуваат цената на нафтата“, изјави Фил Флин, аналитичар од компанијата „ПФГ бест рисрч“ во Чикаго. Се очекува многу ниските температури да ја зголемат побарувачката на енергенси за греење во САД за 21 процент над нормалата. (МИА)