ММФ ќе ја зголеми прогнозата за раст за 2010

Вашингтон - Меѓународниот монетарен фонд во јануари сигурно ќе ја ревидира прогнозата на глобалниот економски раст нагоре, бидејќи економското заздравување во светот ќе биде побрзо од очекуваното, изјави заменик-извршниот директор на ММФ, Џон Липски. „Оваа година почна со општ, иако внимателен оптимизам кога се во прашање глобалните економски и финансиски прогнози“, оцени Липски во напис на Интернет- страницата на Фондот.

Тој прогнозираше дека „нешто попозитивни очекувања несомнено ќе се одразат и во јануарското, ажурирано издание на извештајот на ММФ за движењата во светската економија“.

Во последниот октомвриски извештај ММФ прогнозираше раст на светската економија за 3,1 отсто во 2010 година, по падот на активноста од 1,1 отсто во 2009 година.

Липски, меѓутоа, нагласи дека се' уште има причини за претпазливост, по постапното излегување на светот од рецесија, предупредувајќи на високата стапка на невработеност и кревките финансиски системи во напредните економии, повикувајќи ги владите во 2010 година да продолжат со спроведување на опсежни програми на јавна потрошувачка. (МИА)