ВМРО-ДПМНЕ ќе ги исчепка досиејата за ДУИ?

Ахмети на крстопат: Власта презема мерки откако Црвенковски побара предвремени избори

Билјана Јовановска

Дали е на повидок крај на идилата меѓу ВМРО-ДПМНЕ и ДУИ? Ако се покажат точни вчерашните неофицијални информации дека вмровците се подготвуваат час поскоро да им ги пуштат досиејата на челните луѓе на ДУИ, оние за кои деновиве се тврдеше дека се копии и не се релевантни, може да се случи прегрупирање на политичката сцена. Ќе ги извади ли во меѓувреме ВМРО-ДПМНЕ компромитирачките оригинални досиеја од Белград, брзо ќе излезе на виделина. Наводната намера вчера никој не сакаше да ја потврди. Меѓутоа, очигледно е дека челниците на најголемата владејачка партија покажуваат нервоза, особено по митингот на опозицијата во Штип. Она што досега само го навестуваше, лидерот на СДСМ, Бранко Црвенковски, сега и многу конкретно го соопшти - го чекаат само уште самитот на ЕУ на 16 декември за веднаш потоа да ја почнат постапката за предвремени избори.

Засега, тешко е да се поверува дека Никола Груевски тукутака ќе го прифати барањето на опозицијата. Црвенковски, како што порача од штипскиот плоштад, нема илузии дека власта ќе поработи против себе и дека изгласувањето недоверба на Владата ќе биде лесно совладлив проблем. Но, исто како што типува на етничките партии, помали и поголеми, кои сега се во „владејачкиот“ пакет на Груевски, јасно е дека шефот на опозицијата најмногу се надева на ДУИ. Познато е дека Црвенковски и Али Ахмети имаат чести контакти и за очекување е многу скоро да седнат да договорат што понатаму. По фијаското во Лисабон, Ахмети тешко може да го оправда своето останување во Владата на Груевски. Односно, како што во нашиот весник прокоментира проф. Љубомир Фрчкоски: „ДУИ, која покажа голема еластичност, ќе мора да се пресмета дали подмитувањето за учество во власта ќе биде доволна компензација за темелно уривање на нивните стратегиски цели - Македонија поскоро да стане членка на НАТО и на ЕУ“.

И во случај власта да не ги отвора досиејата на првите луѓе на ДУИ, на оваа партија и' гори под нозете и секојдневно се изложени на притисокот од своите гласачи. Истражувањата покажуваат дека огромен дел од над 50 отсто неопределени граѓани се токму гласачите на ДУИ на кои им е несфатлива политиката на постојано тактизирање и останување во кабинетот на Груевски. Појавата на „Реалитети“ само уште повеќе ја подгрева нервозата и е сериозно предупредување дека во албанскиот политички кампус нешто се случува.

Некои нови ветришта во интервјуто во „Утрински весник“, објавено викендов, најави и Ермира Мехмети од ДУИ. „Влегуваме во фаза во која политичките партии мора да направат анализа околу приоритетите во следните неколку месеци. ДУИ е свесна за сопствената одговорност и за својата позиција во овој контекст. Токму поради тоа одговорно ќе пристапиме кон политичките предизвици, меѓу кои најголем ќе биде предизвикот како да одговориме на очекувањата на нашиот електорат и нашата етничка заедница. Наш впечаток е дека нешто мора да се дефинира“, вели таа.

За што конечно ќе се определи Ахмети и неговата ДУИ, ќе пресечат ли или ќе ги трпат критиките за својата неодлучност, најдобар тест ќе биде најавеното барање на СДСМ за изгласување недоверба на Владата во втората половина на декември.