Иранците навредени од Кушнер
Париз - Иранскиот министер за надворешни работи Манушер Мотаки во саботата не присуствувал на вечерата организирана од францускиот колега Бернар Кушнер, најверојатно, во знак на протест поради критиките на Франција упатени на сметка на Техеран, објавуваат денеска француските медиуми.
Кушнер упатил покана за вечера до сите министри кои допатуваа во Париз за да учествуваат на меѓународен форум посветен на Авганистан.
Според дипломатски извори, Мотаки не ги објаснил причините за непојавувањето на вечерата туку, едноставно, само најавил дека нема да присуствува. Во четвртокот Иран вложи протестна нота до францускиот амбасадор во Техеран поради „неумесните изјави“ на претседателот на Франција, Никола Саркози, кој оцени дека шефот на иранската држава, Махмуд Ахмединеџад, „не го претставува Иран“ и дека не може да се поздрави со него поради неговите тврдења дека Израел треба да биде избришан од картата на светот. (МИА) |
