Фармерот Илиевски за полицијата е дилер на дрога

Душко Илиевски зборуваше на митингот на опозицијата. Тој, неговиот татко и брат му се уапсени, бидејќи, според МВР, ја насадиле нивата со марихуана 

БИТОЛА - Водачот на пелагониските фармери на „Сведмилк“, Душко Илиевски, неговиот татко Томе и неговиот брат Цане се приведени од битолската полиција под сомневање дека на фармата лоцирана во индустрискиот дел на градот одгледувале канабис сатива, растение од коешто се произведува опојна дрога марихуана.

Тројцата мажи од семејството Илиевски добија кривична пријава за недозволено производство и пуштање во промет на наркотички дроги и прекурзори.

Настанот се случи вчера напладне кога Илиевски три часа со лисици на рацете го следеше претресот на полицијата на нивата од неговиот татко во Градско Поле. Непосредно по приведувањето, Илиевски се обиде да ги информира новинарите од Битола, но потоа со часови остана недостапен.
Неговиот брат Цане Илиевски, вознемирен од случувањето, раскажува дека Душко бил приведен од дома пред очите на своите деца и поширокото семејство како да е најголемиот криминалец. Потоа Душко заедно со својот татко го следел увидот на полицијата на нивниот семеен имот во Градско Поле. Претресот на инспекторите продолжил со судски налог во нивниот дом.

„Полицијата го зеде брат ми и го однесе на нивата на татко ми. Наводно, имало коноп во нашиот имот. Но, зошто го уапсија Душко, кога нивата е на татко ми. Сега од брат ми сакаат да направат дилер на дрога. Кога ќе прошетате низ Градско Поле во Битола, ќе видите дека на секаде има диворастечки коноп, па никогаш досега не сме чуле за ваква реакција на полицијата“, реагираше братот на Душко, Цане, пред и тој да биде приведен во битолската полиција.

На дел од телевизиските екипи од Битола, кои вчера се обидоа да го снимат настанот, особено претресот на нивата и фармата на Илиевски, полицијата им нареди да ги избришат снимките. „Во објективот на камерата на Телма се најде службено возило на СВР - Битола, а потоа и инспектор облечен во цивил додека на половина километар од местото на настанот се обидував да го снимам Градско Поле преплавено со диворастечка марихуана. Потоа полицијата побара од мене или да им го предадам видеоматеријалот или да го избришам. Така морав и бев принуден да го избришам видеоматеријалот“, рече снимателот на Телма од Битола.

Пред да се одржи прес-конференцијата на битолската полиција за овој случај, на медиумите им беа покажани запленетите стебла марихуана кои на полицијата ќе им послужат како доказ во случајот против Илиевски. „По претходно оперативни сознанија, извршен е претрес на имот лоциран во Градско Поле, при што се приведени три лица. На нивната нива се откриени 207 стебла канабис сатива од кои се произведува марихуана. Трите лица се приведени во полицијата, а стеблата ќе бидат испратени на вештачење“, изјави Ѓоко Стрезовски, портпарол на СВР- Битола.

Опозициската СДСМ гледа во акцијата на полиција обид на власта за пресметување со неистомислениците. Според нив, станува збор за местенка на фармерот кој поради „портокаловата изродба остана без денар во џебот за да го прехрани семејството и се третира како најголем трговец на дрога“.

„Ги повикуваме Груевски и ВМРО-ДПМНЕ да се освестат и да престанат во партиско-полициски монтирани постапки брутално да се пресметуваат со сопствениот народ“, апелираше вчера опозицијата.

Илиевски, водачот на фармерите на „Сведмилк“ од пред една и пол година, јавно обвинуваше дека е под постојан притисок од полицијата. Откако застана на чело на оштетените фармери на „Сведмилк“, тој доби три прекршочни пријави така што вчерашниот претрес на полицијата во неговиот дом беше втор по ред. Првиот пат, во семејната куќа на Илиевски, полицијата бараше нелегално оружје.

Вториот пат тој беше обвинет за упад во кабинетот на градоначалникот Владимир Талевски со уште дваесетина други фармери за што судот подоцна се изјасни дека делото за кое Илиевски се товари е неосновано. И третиот пат, Илиевски доби прекршочна пријава поради омаловажување и навреда на премиерот Никола Груевски со летоци што самиот ги лепел, наводно, низ битолските улици на кој премиерот бил прикажан како го дегустира јогуртот на „Сведмилк“.

Минатото лето медиумите од Битола известуваат дека стебла од марихуана, кои во делови достигнале висина и до два метра, го обраснаа индустрискиот дел на Битола. Ова растение со чиешто сушење се добива опојна дрога марихуана го има покрај патот што ги поврзува фабриките низ коритото на реката Куределес, па се' до Основното училиште „Коле Камински“ од населбата Карпош. Тогаш од полицијата потврдија дека им е познат случајот оти во Градско Поле на повеќе места никнува див канабис и дека многу лесно се распространува. Но, како што рече полицијата тогаш, од ова ќе побара и ќе го извести Министерството за земјоделство да ги уништи стеблата. Доколку, пак, увидат дека некое лице го собира дивиот канабис, тогаш против него ќе се поднесе и кривична пријава. (А.Б.)