Поглед

Лош почеток на „Охридско“

Невена Поповска

„Охридско лето“ се отвори со концерт на Рускиот национален оркестар и Симон Трпчески, под диригентство на Михаил Плетњов и со настапот на реномирани актерски имиња кои настапија со монолози од своите претстави, во режија на Иван Поповски и Зоја Бузалковска. За жал, многумина од публиката не сфатија дека по концертот следува драмски дел и речиси половина од публиката си замина од Античкиот театар.

Една колешка, понесена од атмосферата, повика: „Седете бре луѓе, ќе има и претстава!“ Но, присутните очигледно или беа неинформирани за содржината на програмата или едноставно немаа повеќе трпение.

Поповски и Бузалковска во целост ја раскажаа приказната за „Охридско лето“. Но, приказната на фестивалот, годинава, за жал, нема среќен почеток.

Непосредно пред стартот на најстарата музичко-сценска манифестација беше сменет од функцијата директорот на фестивалот, Тони Симоноски, поради „евидентни злоупотреби на функцијата и големи пропусти во програмата и во организацијата на ланското издание“. Доколку имало пропусти, а за волја на вистината имаше откажувања на настапите, Симоноски требаше да биде сменет веднаш по завршувањето на минатогодишниот фестивал, а не во пресрет на јубилејот. Но, не остана на тоа. Само неколку дена пред отворањето на фестивалот, во јавноста како бомба одекна веста за апсењето на рускиот пијанист и диригент Михаил Плетњов, кој беше уапсен во Тајланд под тешко обвинение за педофилија. Плетњов тврди дека „целата работа е недоразбирање“. Но, тоа што недостасуваше во публиката во Античкиот театар голем дел од претставниците на културниот живот и дипломатскиот кор во земјава говори дека публиката одлучи поинаку.

Наспроти тоа, Античкиот театар во Охрид во понеделникот вечерта беше исполнет до последното место.