Жал по жртвите од експлозијата во Украина
КИЕВ - Украина жали по жртвите од експлозијата во станбен блок, што се случи во средата во црноморското одморалиште Евпаторија, при што загинаа најмалку 22 лица. Официјални извори јавија дека 21 лице се спасени, но уште 20 станари се' уште се водат за исчезнати. Два влеза во петкатната зграда беа блокирани од бетонот што паѓаше по експлозијата. Причината е непозната иако официјални лица веруваат дека можеби се работи за боци со гас.
Спасувачите ги пребаруваа урнатините, повикувајќи на тишина за да ги слушнат повиците за помош. Лидија Коваленко, станарка, јави за новинската агенција АФП: „Видов син пламен и чад, и имаше ужасна експлозија“. Во зградата, изградена во шеесеттите години, имаше 35 стана. Во четвртокот украинскиот претседател Виктор Јушченко и неговиот политички ривал премиерката Јулија Тимошенко заедно го посетија местото на експлозијата. Подоцна Јушченко го прогласи 26 декември за национален ден на жалоста. Тимошенко рече дека според првичните извештаи, опасни материјали се чувале без соодветна дозвола во визбата. Рускиот претседател Дмитриј Медведев изрази сочуство и рече дека неговата црноморска флота е подготвена да помогне. Евпаторија е популарно летно одморалиште на Кримскиот полуостров во Украина. (Би-Би-Си) |
