Греењето ќе ги изгори скопјани

Граѓаните веќе прават математики дали да се топлат на струја, на дрва или на парно

Снежана Калабакова


Пред стартот на грејната сезона многу граѓани почнаа да прават математики кој ќе биде најисплатливиот начин на греење, дали на струја, на дрва или, пак, да се остане приклучен на градско парно? Многу пари се потрошија овој месец за учениците и студентит��, потребни се уште и за подготовка на зимниците, а допрва ќе треба да се двојат дополнителни пари за греење. Ништо не е евтино, ниту дрвата, ниту парното, ниту, пак, струјата, но во поставената равенка непознатата е како да се потрошат помалку пари, а сепак да се загрева поголема површина од домот.

Голем дел од скопјани откако ги добија августовските сметки за парно во кои е вкалкулирано новото зголемување на цената за 11,35, односно за 14,98 отсто останаа шокирани од новите износи. И корисниците на АД „Топлификација“ и оние на „Скопје Север“ се пред голема дилема, ќе можат ли зимава финансиски да го издржат тоа. Оние на кои веднаш им стана јасно дека не ќе можат да ги плаќаат сметките за парно веќе се откажаа од централното греење. Во „Топлификација Скопје Север“ го направиле тоа 130 домаќинства.

„Го откажав парното веднаш по поскапувањето. За површина од 80 квадратни метри месечно плаќав 3.100 денари само за парно и плус 3.800 денари за струја. Сите мои соседи по вертикала го откажаа парното, што значи сега станот ќе биде незагреан од сите страни. Се одлучив да поставам електрични панели кои чинат најмногу до 6.000 денари. Се' уште не знаеме колку струја ќе плаќаме, ќе видиме. Но, бидејќи од работа се враќаме околу 18 часот, ќе загреваме кога нам ни одговара, а не ’Топлификација‘ да ни диктира греење до 21 часот. Од друга страна, ќе плаќаме само три, четири месеци за греење, а не цела година“, вели Илина Кузмановска.

Сите пресметки за греење се во правец да останат повеќе пари во домашниот буџет. Оние што решиле да го загреваат станот со огревно дрво не им е важно што бара тоа и поголемо ангажирање околу неговата подготовка, палење на печката, како и чистење на пепелта. Велат дека на дрва ќе се греат, но истовремено и ќе готват, па така ќе заштедат и на струја.

Огревното дрво во скопските стоваришта се продава по цена од 2.371 денар до 3.200 денари за кубик. Некаде во цената е вклучен и превозот, а некаде, пак, тој се наплаќа само ако доставата е на поголема оддалеченост.

Во стовариштето во Петровец буката чини 2.371 денар, а дабот, кој ретко доаѓа и се носи по нарачка за синдикати, се продава по 2.453 денари. Во стовариштето на Паштрик во Чаир, буката се продава од 2.800 до 3.000 денари, а дабот од 3.000 до 3.200 денари. За загревање на една и повремено на уште една просторија во дом од шеесетина квадратни метри, за средно студена зима на едно домаќинство му се потребни десетина кубици, односно околу 30 илјади денари. За исто толкав стан месечната сметка за парно изнесува 2.542 денари, односно за 12 месеци се плаќаат 30.504 денари. Тоа значи дека греењето со дрва и со парно е речиси исто скапо, само што со парно се затоплува цел стан, додека со дрва една, евентуално, две простории.

За граѓаните, освен цената на дрвата, многу е важно да се избере и соодветна печка, која подолго ќе ја задржува жарта. Во дуќаните со вакви производи веќе се нудат штедливи печки на дрва, а продажните компании на големо ги рекламираат. Ваквите печки се полнат со пелети на два-три дена, а пепелта од нив се празни на 50-ина дена. Продавачите задолжително потенцираат колкава површина може да се загрева со една ваква печка и колкава е максималната месечна потрошувачка за компресираното дрво.

Многумина наоѓаат решение за греењето во поставување сопствено парно, кое може да биде и на струја и на дрва. Сепак, загревањето на котелот на струја е мошне скапа варијанта, а оние што загреваат куќа на таков начин со површина од шеесетина квадратни метри велат дека во зимските месеци плаќале и по 12.000 денари.

„Многу експериментиравме со греењето, но мислам дека сопственото парно на струја не' чини најмногу. Имаме две мали деца и загреваме според нивните потреби, а за тоа во зимскиот период ни се потребни околу 50 илјади денари. Ако го загреваме котелот со дрва, за десетина кубици ќе потрошиме 34 илјади денари, но парите за огрев мора да ги вложиме одеднаш. Можеби и градското парно е скапо, но помала сума пари се издвојува месечно, иако навистина за цела една година ќе треба да се издвојат повеќе од 30 илјади денари“, вели Жанета Стојчевска.

Тоа дека струјата е скапа варијанта потврдува и Стефанија Симонова од Тафталиџе. Таа тврди дека минатата зима за загревање три спални соби со термопечки морала да издвои од 8.000, па до 12.000 денари за струја кога било постудено. Секако, во таа сметка влегува целокупната струја потрошена во текот на месецот за сите потреби на семејството. Симонова е убедена дека оваа зима сметките ќе бидат уште повисоки, со оглед на новите, повисоки цени на струјата.