Поглед

Пиши-бриши за ЕУ

Слободанка Јовановска

Очигледна невистина - го нарече вчера европарламентарецот Зоран Талер тврдењето на државниот врв за фамозното национално предавство на СДСМ, која одбила членство во ЕУ и во НАТО под БЈРМ во 1995 година.

Ден претходно Ерван Фуере тоа го нарече „бујна фантазија“, порачувајќи дека во земја со над 30 отсто сиромашни и невработени властите би требало да имаат попаметна работа отколку да се занимаваат со минатото.

Она што тргна како 1995 година се протегна на 1997, па на 1998 година, а премиерот Никола Груевски го прошири на една деценија неодговорно владеење на СДСМ, која не поднела барање за членство, бидејќи била презафатена со криминалната приватизација. Вака како што тргна оваа политичка сапуница, кај и да е, премиерот ќе дојде до 2010 година, па, конечно, ќе и' одговори на јавноста на Македонија со каква „транзиција“ се занимава ВМРО-ДПМНЕ, што влијае членството во ЕУ и натаму да е мислена именка.

Начинот на кој државниот врв аматерски лицитира со годините и со настаните најмногу зачудува. Откако токму на веб-страницата на МНР беше објавено дека Македонија воспоставила дипломатски односи со ЕУ во 1995 година, дури по потпишувањето на Привремената спогодба со Грција, хронологијата на настаните исчезна од сајтот.

Ако сакаат да бидат уверливи наредните денови министрите треба да избришат уште многу хронологии и документи во институциите, па фабрикувањето на сегашноста да го поткрепат со фабри��ување на минатото.

Очигледно, сакајќи да се извадат од скандалот владините функционери сосема се закопаа, па деновиве ја разводнуваат тезата за предавство до тој степен - што не се препознава.