Фуере ја демантира 1995, Груевски не прифаќа

Тамара Грнчароска


„Ова е земја што е подготвена да се вклучи во Европската унија, земја што направи големи напори, но се' уште има многу да направи, земја која има 33 отсто невработени, земја во која 30 отсто од граѓаните живеат под стандардите и тоа што се случило во 1995 година не е прашањето што ќе ги реши сите овие проблеми“, порача вчера евроамбасадорот Ер��ан Фуере во Охрид, во својата втора реакција на препукувањето кое трае меѓу власта и опозицијата дали во 1995 година на Македонија и било понудено евроинтегрирање или не. Фуере еден ден порано изјави дека „секој оној што сугерира дека таква можност постоела во 1995 година има навистина бујна фантазија“, бидејќи во 1995 Шведска и Финска се приклучија кон ЕУ, а не ни биле започнати преговорите со земјите што се приклучија на ЕУ во 2004 година.

За премиерот Никола Груевски изјавата на Фуере, сепак, не е демант дека Македонија во 1990-тите години ја пропуштила шансата за влез во ЕУ. Но, место да тврди како досега дека Македонија испуштила конкретна шанса за евроинтегрирање, рече дека тогаш Македонија не направила ништо да поднесе барање за прием во ЕУ.

Според него, власта во 90-тите години повеќе се грижеле за приватизацијата и како да се офајди од неа, како да го крши ембаргото кон Србија и била дефокусирана за привлекување странски инвестиции. „Со тоа ја пропушти шансата за влез во ЕУ и до 1998 година и додека се промени власта, воопшто, немаше поднесено ни барање за членство во Унијата“, изјави Груевски. Тој побара од Бранко Црвенковски да се произнесе што се случувало во 1990-тите години и зошто Македонија, кога сите сакале да влезат во ЕУ, не поднела барање за прием. „Денес опозицијата не' обвинува дека недоволно сме правеле за влез на Македонија во ЕУ, а во минатото нив не им ни падна на памет да поднесат барање за прием во Унијата“ обвини Груевски.

Вицепремиерот за европски прашања, Васко Наумовски, пак, елегантно порача дека не треба да се плашиме од дискусија и дебата за тоа колку е направено за европската интеграција на Македонија во минатото и колку се прави денес. Тој, сепак, одбегна директно да каже дали во 1995 година имало понуда од ЕУ или не. „Постојат неколку клучни моменти во процесот на европска интеграција на Македонија и тоа е Спогодбата за стабилизација и асоцијација, сте��нувањето на статусот држава-кандидат, добивањето на препораката за почеток на преговорите, како и визната либерализација. Доколку детално се анализираат сите овие моменти кога тие се случиле, јасно може да се види дека една политичка опција има завршено најголем дел од работите за три од овие четири клучни моменти од европската интеграција на Македонија“, изјави Наумовски.

На прашањето дали ваквите изјави се ретерирање од тврдењето за испуштена шанса во 1995 година, тој одговори: „Не знам дали во 1995 и' било нешто понудено на Македонија. Тоа најдобро можат да го кажат оние што ја предводеа тогаш државата и тие политичари можат најдобро да кажат колку тие во тој период направиле за европската интеграција на Македонија, колку реформи спровеле и колку ја доближиле државата до наредниот степен за целосна интеграција на државата во ЕУ“.

На изјавата на Фуере се надоврза и опозициската СДСМ, според која таа претставува и официјален став на Европската комисија. „Со тоа јасно беше искажан ставот на ЕК и е уште еден од серијата докази, ако не и најсилен доказ, дека Никола Груевски и Ѓорге Иванов прават најгруб обид за фалсификување на македонската историја”, изјави потпретседателот на СДСМ, Гордан Георгиев.