Семејството доцнеше на погребот

Погребот на кралот на поп-музиката Мајкл Џексон на гробиштата Форест Ловн, во Лос Анџелес, заврши во четвртокот навечер според локално време со задоцнување од еден час поради доцнењето на неговото семејство.

Американските телевизиски медиуми, кои го снимија погребот со камери поставени на крановите на гробиштата, известуваа за целиот настан од тргнувањето на семејството Џексон од имотот Енсино, па се' до крајот.

Колоната од 30 автомобили пристигна на Форест Ловн во придружба на полицијата. Погребното возило со телото на Мајкл Џексон го следеа четири полициски мотоцикли, а целиот простор на гробиштата беше осветлен од рефлекторите на полициските хеликоптери.

Меѓу познатите личности што го испратија Мајкл беше и Бери Бондс, Меколи Калкин, Елизабет Тејлор, музичкиот продуцент Квинс Џонс, комичарот Крис Такер, продуцентот Бери Горди, свештеникот Ал Шарптон, еден од водечките активисти за правата на Црнците во САД и неговата поранешната сопруга Лиса Мари Присли.

Џексон е закопан во големиот мавзолеј на гробиштата Форест Ловн каде што почиваат холивудските ѕвезди Хемфри Богарт, Клерк Гебл, Волт Дизни и други.

На погребната церемонија пееше Гледис Најт, додека постхумниот говор го одржа величествениот Ал Шарптон. Ковчегот на Мајкл, украсен со злато и со посмртни пораки, го носеа неговите браќа Ренди, Тито, Џермеин и Марлон, облечени во идентична црна облека со бела ракавица на едната рака, што беше заштитен знак на кралот.

Децата на Џексон, Принц Мајкл, Парис и Принц Мајкл 2, седеа во првиот ред покрај бабата Кетрин и дедото Џо. Поп-кралот е испратен во вечниот дом по 73 дена од неговата смрт.

Патологот од Лос Анџелес ја прогласи смртта на Мајкл за убиство, а обвинувањата паднаа на грбот на неговиот личен лекар Конрад Мареј, кој му давал смртоносна комбинација на лекови во преголеми дози. Мареј изјавувал дека лекот „пропофол“ му го препишувал на Мајкл поради неговите проблеми со несоницата.

Џексон почина на 25 јуни во својот дом во Лос Анџелес на 50 години, поради застој на срцето предизвикан од лекот.