Болт лесно во Париз, Гетлин прв во Мадрид
Јусеин Болт забележа лесна победа на 200 метри на митингот во Париз од Дијамантската лига во атлетика и покрај тоа што неговиот француски ривал Кристоф Лематр го истрча својот најдобар резултат сезонава од 20,21 секунди. Во пресрет на Светското првенство во Даегу што ќе се одржи од 27 август до 4 септември, светскиот рекордер од Јамајка истрча 20,03 сек., засилувајќи ги подготовките за одбрана на светските титули на 100 м и на 200 м.
„Расчинетиот“ олимписки шампион на 100 м од Атина 2004, Џастин Гетлин, пак, своето враќање по четиригодишната казна поради допинг го продолжи со победа во Мадрид. Американецот, светски првак од 2005 година, истрча стотка за 10,10 сек. со ветер в гради, победувајќи го Британецот Двејн Чемберс, кој, исто така, одлежа суспензија поради допинг. Сонародникот на Гетлин, Тревис Паџет заврши трет.
|
