Далас израмни против Мајами
Маверикси славеа во четвртиот меч (втор на свој паркет) со 86:83 и израмнија во финалната серија на 2:2
Продолжува големата битка за насловот најдобар кошаркарски тим во светот. По поразот во третиот меч, Далас го искористи домашниот терен и славеше со 86:83. Како и претходниот меч, и на овој имаше мал број поени, а интересно е тоа што Далас постигна ист број поени (Мајами тогаш победи со 88:86), во претходниот меч.
Како што се гледа од резултатот, тоа беше битка за секој кош, а како и во вториот меч во Мајами, Далас до големата победа стигна се пресврт на крајот. Мајами во последната четвртина влезе со предност од четири поени, која ја кренаа и на девет, но Далас ги доби последните минути и на крајот славеше.
По којзнае кој пат, Дирк Новицки беше јунакот на Далас и покрај високата температура (38,3), во последната четвртина постигна 10 од вкупно 21 кош, вклучувајќи го и тој за победа на 14 секунди. Во трет меч едноподруго неговата акција го решава победникот. Во вториот го мина Бош и поентираше за победа од 95:93, во третиот не успеа покрај Хаслем, но во овој четврти меч ги надмудри и Хаслем и Вејд за победнички кош.
„Ова е НБА-финале, ако не сакаш тука да го оставиш срцето, тогаш незнам каде. Тука е се' едноставно, мораш да излезеш на терен и да дадеш се' за тимот, а јас тоа го направив“, го предаде на крајот на мечот својот „рапорт“, војникот на Далас, Дирк Новицки. Не се предаваше и кога не му одеше, по воведните шест поени промаши 10 од 11 шута, но се знаеше во кој правец ќе оди топката кога ќе се крши мечот. Тајсон Чендлер одигра добар меч со 13 коша и 16 скока, двоцифрени беа и Тери (17) и Мареион (16).
Од другара страна, Двејн Вејд постигна 32 коша, но го промаши слободното фрлање за израмнување на 30 секунди пред крајот и ја загуби топката за последен напад. Крис Бош во родниот град постигна 24, а потфрли Леброн Џејмс со само 8 поени, најмалку од почетокот на плејофот, со мизерен шут - 3/11. Инаку, до овој меч Џејмс постигнуваше двоцифрен број поени во 434 меча едноподруго!
Како што истакнавме, Мајами ја испушти меч-топката за трфејот во последната четвртина. Без кош беа дури 5 и пол минути, до 1:50 минута пред крајот. |
