Избори со референдум - мамка или реалност

Атмосферата дополнително се подгрева, изборите да бидат одржани заедно со референдумот за името

Светлана Унковска

Идејата за одржување на уште едни предвремени парламентарни избори, иако ја негираат политичките партии, се' повеќе е присутна во јавноста. Информациите кои некако забрзано протекуваат од разни извори укажуваат на фактот дека партиите зад кулисите, сепак, се подготвуваат за изборното соочување. Дополнително атмосферата се подгрева вонредните избори да бидат одржани заедно со референдумското изјаснување за прашањето со името, кое би се искористило за поентирање. Ова значи дека од начинот како ќе биде поставено прашањето, автоматски би можело да биде искористено во полза на изборниот скор на владејачката ВМРО-ДПМНЕ.

Атмосферата што се создава и од владејачкиот и од опозицискиот табор, со кампањи и нови програми, само го потврдува фактот дека работите одат кон тоа дека за нецела година повторно ќе ни претстои гласање. Експертските процени се дека владејачката партија, најверојатно, ќе го искористи поволниот исход од неколкуте позитивни моменти, кои ќе и' се случат на Македонија со извештајот од Европската комисија, како и визната либерализација од почетокот на идната година. Истовремено, рестартирање на мандатот власта, најверојатно, ќе посака да и' се случи, пред опозицијата да успее во намерата за нејзино консолидирање. Во меѓувреме, нема да запре ни секојдневното удирање камен-темелници од кое малку вистински се реализира, а за сите активности на премиерот со својата владина свита фотографиите се ставаат на профилот на премиерот Никола Груевски на „Фејсбук“.

„Моментот е на некакво политичко исчекување на надворешните моменти на нашава политика околу одлуката во Брисел за извештајот, а потоа и за визната либерализација, па се чини како да виси во воздух сето ова. Ако партиите на власт калкулираат со сценарио со позитивен исход, кое ќе биде на крилата на некаква позитивна еуфорија, тогаш тоа ќе биде еден вид плебисцит за потврдување на уште еден мандат“, вели професорката Билјана Ванковска.

Се' погласни се размислувањата и на лидерот на опозициската СДСМ, Бранко Црвенковски, кој во интервју за „Дневник“ вели дека евентуалната варијанта за распишување на и��борите заедно со референдумот за името е апсолутно неодговорно и чиста глупост.

Професорката Ванковска не го оправдува референдумот, туку избори кои ќе бидат еден вид плебисцит откако Владата ќе донесе решение за името.

„Би оправдала избори ако Владата и' соопшти на јавноста дека, дефинитивно, е донесена одлука за името и ако излезат со јасен владин став. Едноставно, да побараат од народот повторна доверба и тоа да биде наместо референдум. На овој начин, Владата би можела тогаш да побара доверба, затоа што е историско прашање и има национална тежина. Бидејќи тоа е клучно прашање, и јас би била лично заинтересирана да излезам и да гласам“, истакнува Ванковска.

Но, кои ќе бидат одлучувачките фактори на предвремените избори и како Груевски ќе го оправда пред граѓаните повторното непотребно трошење енормно народни пари? Ако претходните вонредни избори ги оправда со потребата од поголема поддршка во парламентот за да можат поефикасно да работат, прашање е како сега ќе го оправдаат повторното организирање избори, кои на народот веќе им дојдоа и преку глава од избори?

„Владејачката гарнитура ќе ја фрли истата мамка околу тоа народот да каже кои се подобри и дека, еве, и' дава шанса на преструктурираната опозицијата, иако знае дека таа се' уште е во мат-позиција. Бидејќи знаат дека со текот на времето тие би можеле да се консолидираат во една поинаква форма, дотогаш нема да сакаат да чекаат. Сега околностите ќе се искористат да се добие продолжен мандат и власта ќе оди на факторот изненадување на опозицијата. Многу мириса на избори“, вели професорот Стефан Буџаковски. Тој се согласува и дека ќе биде искористен и позитивниот момент со визната либерализација и со извештајот на ЕК.