Цели тимови ќе покриваат различни области, согласно со ресорите во вистинската Влада на „Илинденска“

Александра М. Митевска


Откако ќе ја прошетаат целата држава со новата програма „Решенија за Македонија“, социјалдемократите планираат да го стават под уште поголема лупа функционирањето на власта, на која би требало да и' се спротивстават и со влада во сенка. Таа идеја би заживејала во почетокот на следната година, а засега се наѕираат само нејзините контури. „Владата“ на улица „Бихаќска“ ќе се базира на кабинетски модел, така што цели тимови ќе покриваат различни области, согласно со ресорите што функционираат во „вистинската“ Влада на „Илинденска“.

Иако ќе биде кабинетска, владата во сенка би требало да ги исфрли на виделина луѓето на кои би можел да смета Бранко Црвенковски во случај да се врати на власт или, пак, кога би се нашол во ситуација да партиципира во власта.

Најавата дека СДСМ ќе формира влада во сенка ја заинтригира јавноста, која, сепак, уште извесно време само ќе може да нагаѓа кои личности ќе им бидат „двојници“ на Ставрески, Јанкулоска, Милошоски или на Османи, Бесими... ? Кој ќе биде министер во сенка за евроинтеграции, а кој за земјоделство...? Секако, под претпоставка дека Црвенковски ќе биде премиер во сенка.

Секретарот на СДСМ, Андреј Петров, вели дека неговите сопартијци моментно се сконцентрирани на афирмација на програмата што беше усвоена минатиот викенд. Владата во сенка, пак, би требалa да биде следниот потег од постконгресното дејствување на најголемата опозициска партија.

„Одиме чекор по чекор. Сега примарна цел ни е да им ја доближиме на граѓаните нашата програма. Тоа ќе ни биде главна обврска до Нова година, а потоа би можеле да пристапиме кон промоција на владата во сенка, што ќе претставува нов концепт на политичката сцена“.

Влада во сенка не направи ниту една опозициска гарнитура во досегашните пет состави на парламентот, иако имаше неколку слични идеи што не доживеаја реализација. Ваквиот модел на опозициско дејствување, всушност, е најкарактеристичен за Велика Британија, каде што секој министер си добива свој ривал во сенка од опозицискиот табор, кој има задача што поуверливо да ги критикува потезите на владејачкиот министер и да понуди алтернативни мерки за одредени прашања, а се' со цел да ја натера извршната власт на поквалитетно работење.

Сепак, треба да се има предвид дека британскиот парламентаризам, не само што е со далеку поголема традиција од македонскиот, туку е и многу поразличен од нашиот. Таму има две големи партии што се менуваат на власт и кои, најчесто, обезбедуваат апсолутно мнозинство во претставничкиот дом, така што коалиционите влади се мошне ретки. Освен тоа, парламентот во Британија има мошне значајна улога во политичкиот живот во земјата, така што парламентарците, без разлика дали се од власта или од опозицијата, секоја недела ја бомбадираат Владата со прашања.

Актуелнава македонска Влада, пак, иако е коалициска, е под силно влијание на ВМРО-ДПМНЕ, така што, очекувано, парламентарното мнозинство не се наметна како коректор на извршната власт. А, безусловната поддршка што ја добива Владата од парламентарното мнозинство би требала да претставува предизвик за опозицијата да излезе од „ладовина“. Оти од многу седење во сенка може да се добие хронично воспаление, особено ако власта се одлучи да оди на редовни парламентарни избори

Црвенковски неодамна посочи дека планираната влада во сенка ќе ја сочинуваат луѓе од СДСМ, бидејќи партијата како опозициска не е во коалиција со други партии, ниту, пак, засега е на повидок некое поформално сојузништво. Претседателскиот кандидат Љубомир Фрчковски во последната колумна ги посоветува социјалдемократите засега да не форсираат никаква коалиција со други партии. Бидејќи „тоа е лоша порака, ориентирана на математика за власт, а таква нема засега“.

„Опозициските министри“, всушност, ќе бидат промотори на новата програма на СДСМ, која има цел да понуди алтернативен концепт на тој што го практикува Владата. Тие ќе треба да ја убедат јавноста дека опозициските кадри и решенија заслужуваат доверба.

„Ова не е изборна програма, бидејќи не сме пред избори. Ова е програма во која се посочени генералните насоки. Во оној момент кога ќе се знае кога ќе се одржат изборите, ’Решенија за Македонија‘ ќе се трансформира во изборна програма и тогаш ќе бидат наведени и рокови и динамика за остварување на целите“, изјави Црвенковски во постконгресното интервју за А1.