Претходен број

Малата Ангела ќе ја бара и Интерпол

Пронајдени останатите тројца исчезнати. Шестгодишното девојче од Дуње и натаму го нема

Пронајдени се тројцата полнолетни граѓани што исчезнаа пред некој ден. Единствено малата Ангела и натаму ја нема.

Дваесетгодишната Санија Селимоска од прилепското село Пешталево, која пред шест дена го напуштила домот, се јавила по телефон и побарала од нејзиното семејство да ја земат од Прилеп.

„Им рекла дека се наоѓа на булеварот ‘Гоце Делчев‘ во Прилеп и оти тука ќе ги чека. Но, ова не било првпат девојката да го напушта домот. Тоа се случило неколку пати досега. Најверојатно девојката имала нарушени односи со татко и', па тоа било причина да заминува од домот“, вели Ѓоко Стрезовски, портпарол на СВР Битола.

И Благоја Божиноски (73) од Крапа, Македонски Брод, е пронајден во близина на бензинската станица кај селото Дебреште. Старецот имал проблеми со слухот и со говорот.

Петнаесетгодишната Лиријана А., за која татко и' пријави дека изминатиот викенд исчезнала од неговиот поглед на плоштадот „Македонија“ во центарот на Скопје, вчера била пронајдена кај нејзиното момче. Неофицијално, љубовната врска меѓу девојчето и момчето не била одобрена од нејзиниот татко, поради што таа се одлучи на ваков потег.

Но, малата Ангела Ѓорѓиеска од мариовско Дуње и натаму е недостапна за органите на прогон. Надлежните и вчера го пребаруваа теренот, извршија реконструкција на настанот, ги пребаруваа бунарите, јамите и сите други места каде што постои и најмала шанса да се пронајде шестгодишното девојче. Теренот го надлетуваше и хеликоптерска единица, а инспекторите продолжија со распит на жителите на Дуње и на околните села. Полицијата бара дозвола од родителите да се објави фотографија на нивната ќерка и да се побара помош од сите граѓани во земјава, а за случајот би се барала помош и од Интерпол, во случај девојчето да е киднапирано и пренесено надвор од државава.

„Поради мерки на претпазливост, потрагата од локално беше подигната на национално ниво и беа алармирани сите полициски станици и гранични премини“, велат од МВР.

Ангела исчезна без никаква трага во четвртокот, минатата недела, околу 12 часот. Нејзината братучетка Стојна ја оставила на 200 метри од куќата, со верба д��ка оттука шестгодишното девојче може безбедно да се врати назад во куќата на своите родители.

Од тој момент никој не ја видел Ангела. Жителите раскажуваат дека во селото било видено возило со тетовски регистарски таблички два дена пред исчезнувањето на детето.

Семејството и жителите на Дуње се вклучени во потрагата по девојчето. Тие стравуваат дека Ангела можеби е киднапирана.

Полицијата бара помош од сите граѓани. Ангела била облечена во бела блуза со карта на Македонија во црвена боја со натпис „шампиони“. Според описот даден в полиција, таа носела сини тренерки и розови влечки. Девојчето е високо околу 115 см, со костенлива коса и кафени очи.

Од МВР информираат дека годинава за исчезнати биле пријавени 34 лица, од кои 19 од машки, а 15 од женски пол. Биле пронајдени 24 од нив. Лани, пак, за исчезнати биле пријавени 111 лица, од кои 103 биле пронајдени, а по осум лица се' уште се трага. Од исчезнатите, 60 биле од женски, а 51 од машки пол. Пет лица од исчезнатите биле деца, а 19 малолетници, велат од МВР. (Мн.Т.-Г.А.)