Федерер: Физички се чувствувам подобро од кога било
Швајцарецот верува дека ќе освојува гренд-слем турнир се' додека е здрав
Два дена по освојувањето на УС опен Роже Федерер изјави дека никогаш не ја загубил вербата во освојувањето на гренд-слем турнирите. Во Австралија загуби во полуфиналето од Новак Ѓоковиќ, а во Ролан Гарос и Вимблдон од Рафаел Надал. Последен пат сезона без освоен гренд-слем одигра во 2002 година, а пред УС опен Федерер годинава имаше само два освоени турнира, во Есторил и во Хале. Златото во двојки на ОИ во Пекинг му дојде како утеха за лошата игра во сингл, а петиот наслов во Њујорк, сепак, му ја спаси сезоната на „волшебникот“ од Базел, кој оваа година, по четири и пол сезони владеење со светскиот тенис, го загуби и првото место на АТП-листата.
„Верувам дека ќе бидам способен за освојување гренд-слем турнири се' додека сум здрав. Во тоа ќе верувам се' до крајот на кариерата. Во моментот кога во тоа нема да верувам, најверојатно ќе се повлечам од тенисот“, изјави Федерер и додаде: „Денес физички се чувствувам подобро од било кога во кариерата! Можеби оваа година за мене беше тешка, но во овој момент, два дена по освојувањето на УС опен, дури и се чудам колку сум свеж. Ги нема веќе оние ситни повреди кои ме мачеа додека бев помлад. Кога имав 20 или 21 година, секој ден имав болки во раката. По мечот, да речеме, четири часа, ме болеа мускулите. Сега тоа го нема“, вели Федерер и подвлече уште еднаш дека има намера да игра на ЛОИ во 2012 година во Лондон. Јасно е и поради што толку се радува на тие игри. Олимпискиот турнир ќе се одржи во Вимблдон.
Роже Федерер вели дека насловите во Њујорк се' уште го радуваат, затоа што копијата на трофејот е со иста големина како и оригиналот.
„Во Вимблдон копијата е голема само 75 отсто од големината на оригиналот, на Австралија опен е прилично мала. Ролан Гарос? Тоа не го знам, се пошегува Федерер, со оглед дека во Париз никогаш не го добил трофејот наменет за победникот.
Со 13 гренд-слем титули Федерер стигна на чекор до Американецот Пит Сампрас, кој во својата колекција има 14 титули на најголемите турнири. (ХтНет) |
