„Вирџин“ доби рок до крајот на месецов за да ја купи Хонда
„Вирџин груп“ на сер Ричард Бренсон доби рок до крајот на овој месец да реши дали ќе го купи Ф1-тимот на „Хонда“ или јапонскиот производител на автомобили ќе ја затвори фабриката. „Хонда“ во средата потврди дека „Вирџин“ е еден од потенцијалните купувачи.
„Преговараме со неколкумина купувачи и еден од нив е ’Вирџин груп‘“, изјави портпаролот на „Хонда“ за Би-Би-Си.
Весникот „Дејли мејл“ тврди дека „’Хонда‘ инсистира на договор до крајот на месецов, во спротивно ќе го спроведе својот план за затворање на фабриката во Нортемптоншир“. Ако се случи тоа, тогаш повеќе од 700 луѓе ќе останат без работа, вклучувајќи ги и возачите Џенсон Батон и надежта на тимот Бруно Сена.
Гласиштата што кружат додаваат дека „Хонда“, сепак, има намера да ги задржи тимот и фабриката, па дури и предложила да му помогне на евентуалниот купувач со сопствен удел од 40 милиони фунти, оставајќи му на „Вирџин“ или на кој и да е друг да обезбеди уште 80 милиони со кои тимот би бил сигурен дека ќе ја истурка сезоната.
Извршниот шеф за операции во Хонда Рејсинг Ф1, Ник Фрај, и тимскиот шеф Рос Браун, наводно, заедно дале понуда за менаџерски откуп на тимот, се очекува да останат дури и ако „Вирџин“ ја преземе контролата. Фрај, сепак, би можел да отпадне имајќи предвид дека не стои најдобро со клучниот сојузник на Бренсон, Едриен Рејнард, соосновач на тимот на БАР кој подоцна стана Хонда. |
