Македонија во вториот шешир во ждрепката за ЕП
Извлекувањето на групите е на 24 март, а еврошампионатот за ракометарки в година
Женската ракометна репрезентација на Македонија ќе биде во вториот по квалитет од вкупно четири шешири од кои на 24 март во Виена ќе бидат извлечени седум квалификациски групи за 9. Европско првенство што ќе се одржи од 9 до 19 декември 2010 година во Данска и во Норвешка. Шеширите се формирани врз основа на ЕХФ-ранкингот, на кој Македонија е десетта со 208 бода собрани од трите последни големи натпреварувања, и тоа 96 бода од ЕП 2008 на кое беше седма, 56 од СП 2007 на кое го освои 12. место, пласман и бодови освоени и на ЕП 2006. Во истиот шешир со Македонија се и Шведска, Полска, Украина, Австрија, Србија и Белорусија, кои ќе ги избегне како ривали во групата.
Носители на групите ќе бидат Русија, Германија, Шпанија, Унгарија, Франција, Хрватска и Романија. Третиот шешир ќе го сочинуваат Холандија, Словенија, Португалија, Турција, Словачка, Чешка и Исланд. Во четвртиот се Литванија, Италија, Црна Гора, Бугарија, Швајцарија и двете најдобри селекции од претквалификациите, во кои ќе учествуваат Азербејџан, Грција, Финска и Велика Британија.
Покрај соорганизаторите Данска и Норвешка, кои беа содомаќини и на мундијалот во 1999 година, настап на ЕП ќе изборат двете првопласирани репрезентации од секоја од седумте квалификациски групи, во кои ќе се игра по принципот секој со секого дома и на гости. Првото и второто коло треба да се одиграат од 14 до 18 октомври годинава, третото и четвртото од 31 март до 4 април 2010 и двете последни рунди од 26 до 30 мај 2010. |
