Претходен број

Трифун Костовски бара нови правила за „игра“ во Вардар

Тој упати ултиматум до Поповиќ и побара писмена потврда од Камчев и „Комитите“ за отстапување од Собранието

Сашко Ѓ. Димовски

Трифун Костовски и дефинитивно ќе остане во Вардар до крајот на сезоната, а не е исклучена можноста да биде дел од „црвено-црните“ и во следните. Но, и за едната опција и за другата потребно е да се исполнат одредени услови, да се прецизираат нови правила за игра. Затоа скопскиот градоначалник најпрво упати ултиматум до српскиот бизнисмен, Мишо Поповиќ, а од колективните членови на Собранието на Вардар (Орце Камчев и Комити) и ФФМ побара редефинирање на условите за игра.

„Ако мисли да го земе Вардар тоа да го стори веднаш со тоа што ќе достави проект за управување во клубот. Сакам да видам што планира да прави и да видам да легнат пари на сметка. Во спротивно ништо. Од искуството во Македонија досега научив дека треба да верувам само во она што ќе го видам. На зборови повеќе не верувам никому“, порача екс претседателот на „црвено-црните“, Трифун Костовски, но притоа истакна дека е навреден од односот кон него на поединци и кругови:

„Работам и живеам во Македонија, а притоа се чувствувам како човек од втора категорија. Кога го преземавме клубот стекнавме само просто мнозинство во Собранието. Добивме 15 делегати, Камчев и Комитите по 7. За Поповиќ се работеше да добие стоотстотна контрола на Собранието. Но, информациите за него не ��е такви какви што некој сака да ги прикаже. Човекот што се најавуваше како голем спонзор и спасител на клубот, човекот што беше пречекан со песни и тапани, не го реализира она што го говореше дека ќе го стори“.

Костовски најави започнување на разговори со фудбалерите и редефинирање на договорите со нив и подмирување на долгот кон нив што настана во изминатиот период. Неофицијално дознаваме дека платите ќе им бидат намалени за 40 отсто согласно амбициите на екипата во пролетниот дел од првенството. А, во него вардарци ќе влезат со дијаметрално спротивни цели од оние со кои ја стартуваа сезоната. Ако тогаш се најавуваше атак на двојната круна, сега приоритет е зачувување на прволигашкиот статус. Вардар ќе се обиде да го стори тоа со преостанатите фудбалери кон кои ќе се придодат шест-седум играчи од младинската школа. Тренер на „црвено-црните“ пролетва ќе биде Жикица Тасевски.

„За да останеме во Вардар и по завршување на оваа сезона бараме целосна контрола на Собранието. Пролетва ќе останеме, но за понатаму не се знае. Ќе бараме писмена потврда на останатите два колективни членови за доброволно отстапување од Собранието на клубот“, изјави Костовски.

Тој упати прашање и до Фудбалската федерација на Македонија (ФФМ) чија е одлука за случајот Васоски е чудна бидејќи е донесена во време кога семејството Костовски го презема Вардар. Затоа апелира до ФФМ да ја поништи одлуката или, пак, да ја стави во мирување се додека не се создадат подобри услови.

„Нема да му исплатам ниту цент на Драган Томовски“, дециден е Костовски, а за тоа што Вардар е под суспензија тој дополни

„Ако суспензијата не биде симната тогаш Вардар нека го водат ФФМ и Комитите“

И навивачите на „црвено-црните“ беа на дневен ред на вчерашната прес конференција.

„Такви навивачи не сакам. И да останеме во Вардар такви не ми требаат. Замислете како може фудбалерите на Вардар да бидат мета на сопствените навивачи. Играчите беа гаѓани од трибините на стадионот во Кичево дури и кога Вардар водеше со 1:0. Тоа е незамисливо“, вели Костовски и додаде:

„Бев вџашен кога дознав дека Комитите добивале одредена сума пари за џепарлак и за да навиваат за Вардар. Кај се видело во светот навивачи да земаат пари за да го бодрат својот клуб“.

Во контекст на тоа се надоврза и Дејан Чекаров, технички директор на Вардар.

„Останавме доследни и не дозволивме ниту еден играч да си замине, иако бевме под голем притисок, со цел новото раководство да може да разговара со секој од нив поединечно. Документи им дадовме само на Милисављевиќ, Ковачевиќ и Станишиќ и тоа поради закани по нивната лична безбедност од дел од навивачите“, посочи Чекаров.

За настанатата ситуација во Вардар се огласи и новиот претседател, Бојан Захариев. Тој истакна дека не му е сеедно што неговото име беше дел од хаосот во клубот, но како што вели се е школо во животот.

„Можам да кажам дека инцидентот на Мишо Поповиќ во канцеларијата на Трифун Костовски беше вовед во неговата несериозност и сомнителност во намерите. Во секој случај не вреди да се полемизира за човек што не држи до себе“, рече Захариев.