Интер ќе мора да почека за шампањ
„Нероазурите“ ремизираа кај Киево (2:2), без победник заврши и „Дербито на Италија“ меѓу Милан и Јувентус (1:1)
Интер ќе мора да причека барем до наредниот викенд за да отвори шампањ и да ја прослави одбраната на титулата во италијанското фудбалско првенство. Виновни за тоа се фудбалерите на Киево кои одиграа храбро и го задржаа големиот противник на 2:2 во рамки на 35 коло во Серија А. „Нероазурите“ двапати имаа водство на распродадениот „Бентегоди“ во Верона, преку Креспо во 3 минута и Балотели во 65, домашните двапати го анулираа со головите на Карколини во 27 и Лучијано во 73.
Киксот на Интер не успеа да го искористи Милан кој во „Дербито на Италија“ одигра 1:1 против Јувентус на „Сан Сиро“. Сидорф погоди за „росонерите“ во 57 минута, Јакинта возврати во 60. Свесни дека со бод ќе пропуштат прилика да му ја искомпликуваат мисијата на градскиот ривал фудбалерите на Карло Анчелоти додадоа гас, но единствено што им успеа е да останат со човек помалку на тревникот по исклучувањето на Фавали во 85 минута. Па, така Интер ја задржа предноста од седум бода во однос на Милан на врвот на табелата на три кола до крајот на сезоната.
Во акцијата освојување на четвртото место и пласманот во квалификациите за Лигата на шампионите, Фиорентина славеше на Сицилија против Катанија со 2:0, а нејзиниот директен конкурент, Џенова, ремизира во Бергамо против Аталанта (1:1).
Рома одигра уште дуел за заборав, овојпат на Сардинија, против Калјари (2:2). Преполниот „Сант Елија“ еуфорично ги прослави головите на Матри во 34 и Аквафреска во 58 меѓутоа „римската волчица“ набрзо го стивна „вулканот“ и го погодоците на Тоти во 63 и Перота во 68 успеа да извлече бод.
Серија А, 35. коло
Резултати: Милан - Јувентус 1:1, Киево - Интер 2:2, Калјари - Рома 2:2, Аталанта - Џенова 1:1, Сиена - Палермо 1:0, Лече - Наполи 1:1, Катанија - Фиорентина 0:2, Торино - Болоња 1:1, Лацио - Удинезе 1:3, Сампдорија - Реџина 5:0.
Табела: Интер 78, Милан 71, Јувентус 67, Фиорентина 64, Џенова 61, Рома 54, Палермо 52, Удинезе 51, Калјари 50, Лацио 47, Аталанта 45, Сампдорија 44, Наполи 43, Сиена 43, Катанија 40, Киево 36, Торино 31, Болоња 30, Лече 29, Реџина 27. |
